Baızaq aýdanynda Elbasynyń «Bolashaqqa baǵdar: rýhanı jańǵyrý» baǵdarlamasy aıasynda Jambyl oblysynyń 80 jyldyǵyna jáne Qarttar kúnine oraılastyrylǵan «Aqylman aqsaqaldar» aýdandyq baıqaýy ótti.

Aýdan ákimdigi mádenıet jáne tilderdi damytý bóliminiń qoldaýymen ál – Farabı atyndaǵy mádenıet úıiniń uıymdastyrýymen ótken sharaǵa 18 aýyldyq okrýgtiń namysyn qorǵaýǵa, 63 jastan asqan 15 qarıa qatysty.

Shara maqsaty – kópti kórgen danagóı qarttarymyzdyń ónegeli ómirin úlgi ete otyryp, ǵıbrat bolarlyq sózderin jas urpaqtyń boıyna sińirý. Sondaı – aq, qarıalar boıyndaǵy asyl qasıetterdi dáripteý arqyly jastardy ataly sózdiń qudireti men halqymyzdyń salt – dástúrlerin qasterleýge úıretý.

Baıqaý shymyldyǵy mádenıet úıiniń ánshisi Janat Sálimbaevanyń oryndaýyndaǵy «Aǵalarǵa arnaý» ánimen ashyldy. Odan soń saıys sharttaryna sáıkes qarıalar ózderin qara sózben, óleń joldarymen de, qoldaryna dombyralaryn alyp, jyraýlarsha ándetip tanystyrǵandar da boldy. Ekinshi shart: jerebe boıynsha ekranda shyqqan ulttyq salt – dástúrge qatysty saýaldarǵa kópterektik Ábdirahman Kenjebaev pen Temirbek aýyldyq okrýginen qatysqan Amanǵazy Halyqov múdirmeı jaýap berip, kópshiliktiń ystyq yqylasyna bólendi. Ármen qaraı aqsaqaldar maqal – mátel, ónegeli - ósıet sózder aıtýdan baqtaryn synap, bata berýden aldaryna jan salmady.

Qarıalarymyzdyń ónerin qazylar alqasynyń tóraǵasy, aýdandyq ardagerler keńesiniń tóraǵasy Kemelbek Bespaev, músheleri Qoǵamdyq keńestiń tóraǵasy Jumanǵalı Qumǵanbaev jáne Qazaqstan Respýblıkasynyń mádenıet qaıratkeri, KSRO mádenı – aǵartý isiniń úzdigi Kópjasar Arynulynyń sheshimimen bas júldege temirbektik Amanǵazy Halyqov laıyq dep tanyldy. Birinshi oryndy Túımekent aýylynan kelgen Nıazhan Beısenov ıelendi. Ekinshi oryndy qostóbelik Maıdanbaı Baıjanov enshilese, úshinshi oryndy myrzataılyq İles Júzbaev oljalady. Yntalandyrý syılyǵy Jańaturmys aýyldyq okrýginiń namysyn qorǵaǵan Tólendi Basyqaraevqa tabys etildi.

Baıqaýda bási basym túsken jeńimpazdar men qatysýshylarǵa uıymdastyrýshylar tarapynan Dıplomdar jáne baǵaly syılyqtar tabys etildi.