Jambyl oblysy Qazaqstan halqy assambleıasynyń «Jańǵyrý joly» jastar qozǵalysynyń birqatar belsendileri men óńirlik etnos ókilderiniń jas músheleri Túrkistan qalasyna saıahat jasap qaıtty.
Sharaǵa oblystyq assambleıanyń belsendi jastary, Jambyl oblysy ákimi apparatynyń «Qoǵamdyq kelisim» komýnaldyq memlekettik mekemesi, «Jańǵyrý joly» jastar qozǵalysynyń óńirlik shtabynyń músheleri, az qamtylǵan otbasynan shyqqan mektep jáne kásiptik-tehnıkalyq oqý oryndarynyń oqýshylary men bilimgerleri, ata-anasynyń qamqorlyǵynsyz qalǵan balalar qamtyldy.
Ekskýrsıanyń basty maqsaty – Qazaqstandaǵy jastar jyly aıasynda Túrkistan, Jambyl oblystarynyń belsendi jastaryn Qazaqstan prezıdenti Joldaýy júktegen mindetterge jumyldyrý, qoǵamdyq kelisim men jalpyulttyq birlikke negizdelgen qazaqstandyq patrıotızm qundylyqtaryn ilgerletý bolyp tabylady. Sondaı-aq, óskeleń urpaqty elimizdegi ishki týrızmdi qalyptastyrý, ólke tarıhymen jáne onyń geografıasymen tanystyrý.
Kóne Taraz shaharynan ejelgi Túrkistanǵa bet alǵan jastardyń kerýeni jol boıynda elimizdiń ońtústik astanasy sanalatyn shyraıly Shymkent qalasyna toqtap, jergilikti assambleıanyń jastarymen júzdesti.
Kezdesý basynda sóz sóılegen Jambyl oblysy ákimi apparatynyń «Qoǵamdyq kelisim» KMM basshysy Rano Mahsýdqyzy jergilikti assambleıa qyzmetkerelerine alǵysyn aıtyp, jastarǵa jalyndy sózderin arnady. Sondaı-aq ekskýrsıanyń aldaǵy baǵyt-baǵdarlarymen tanystyryp, jastarmen birge atqarylyp jatqan jumystyń júıesine toqtaldy. Kezdesý barysynda eki jaqtyń jyl boıy atqarylǵan jumystarynyń qorytyndysy, Joldaýǵa qoldaý bildirgen jastar, Abaı Qunanbaıulynyń 175 jyldyǵyna arnalǵan chellendjdiń jalǵasýy týraly oılar men pikirlerin ortaǵa saldy.
Ekskýrsıanyń ekinshi kúni Qoja Ahmet Iassaýı, Rabıǵa-Sultan Begim keseneleri, Qoja Ahmet Iassaýı kesenesiniń mańynan oryn tepken emdik qasıetke ıe shyǵys monshasy, Qylýet jer asty meshitine, Sháýildir aýylyndaǵy Arystan-Bab kesenesi, Otyrar qalashyǵy, Otyrar tarıhı-ólketaný murajaıyna saıahat jasaǵan jastar tarıhpen betpe-bet kelgendeı áser aldy.
Q.A.Iassaýı kesenesi XIV ǵasyrdyń sońynda turǵyzylǵan arhıtektýralyq ǵımarat. Qoja Ahmet Iassaýı dúnıe salǵannan keıin halyqtyń kóp jıylýymen ózine arnap soǵylǵan kishkene mazarǵa jerlenedi. Keıin bul kesene musylmandardyń jappaı táý etý ornyna aınalǵan. Mekeme qyzmetkerleri assambleıa jastaryna bas suqqan ár kıeli oryndy jiti tanystyrdy. Olar týraly kóptegen aqparattarmen bólisip, tarıh tunyǵynan sýsyndatty.
