Halqymyz «Ustazdyq etý – talaby qashanda taýsylmaıtyn, zamany eshqashan eskirmeıtin kásip» - dep muǵalim mamandyǵyna erekshe yqylas tanytqan. Iá, shákirt sanasyna sáýle shashyp, shyraq otyn mazdatqan ustazdarymyzdyń tól merekesi de kelip jetti.
Tabıǵattyń tamasha mezgili, altyn kúzben qatar kelgen kásibı mereke - ustazdar kúnine oraı Baızaq aýdandyq mádenıet úıinde “Ustaz aty - bıik ári máńgilik” taqyrybynda merekelik shara ótti.
Saltanatty jıynda minberge kóterilgen aýdan ákimi Nurjan Nurjigitov ustazdar qaýymyn kásibı merekelerimen quttyqtady.
Aýdan basshysy: «Mekteptiń júregi», «Bala janynyń baǵbany»… Iá, bul mektep muǵalimi — ustazǵa arnalǵan teńeýler», - degen sózin tilge tıek ete otyryp, ótken oqý jylynda aýdan ustazdary men bilimdi shákirtterdiń jetken jetistikterin atap ótti.
Bilim salasynda uzaq jyldar jemisti ter tógip, búginde eńbeginiń zeınetin kórip otyrǵan, ardager-ustazdar qaýymyn da atap, el erteńi, bolashaq ulandardyń boıyna bilim men ónerdi, adamgershilik pen adaldyqty, týralyq pen shynshyldyqty, rýhanı baılyq pen ulttyq qasıetterdi sińirip, olardy tulǵaly azamat etip qalyptastyrýdaǵy eńbekterine shyǵarmashylyq tabys tiledi.
Odan soń aýdan ákimi atynan ustazdar qaýymyna gúl shoqtary tabystalyp, marapattaý rásimine ulasty. Atalmysh rásimde aýdan basshysy birqatar ustazdar qaýymyna Qazaqstan Respýblıkasy Bilim jáne ǵylym mınıstrliginiń Qurmet gramotasy men Alǵys hatyn, oblys ákimdigi bilim basqarmasynyń Qurmet gramotasy men Alǵys hatyn, aýdan ákiminiń Qurmet gramotasy men Alǵys hatyn, "Nur Otan" partıasy aýdandyq fılıalynyń Qurmet gramotalaryn saltanatty túrde tabys etti. Sondaı-aq, aýdandyq deńgeıde ótkizilgen "Úzdik pedagog" baıqaýynyń jeńimpazdary da marapattaldy.
Marapat legi munymen tolastaǵan joq. Sahnaǵa kóterilgen aýdandyq máslıhat hatshysy Nurjan Tlepov Úlgili orta mektebiniń bastaýysh synyp muǵalimi Nurjamal Abdýllaevaǵa, Qosaq negizgi mektebiniń beıneleý óneri pániniń muǵalimi Ásem Maılyqulovaǵa, aýdandyq isker áıelder qaýymdastyǵy "Altyn jas" seksıasynyń tóraıymy Gúlnar Qosymovaǵa, osy seksıanyń múshesi, zeınetker-ustaz Fatıma Ospanovaǵa, "Áıel jáne saıasat" seksıasynyń tóraıymy Sholpan Baıtaqovaǵa, aýdandyq máslıhattyń besinshi shaqyrylym depýtaty, bilim berý salasynyń ardageri Tazagúl Kadımova men altynshy shaqyrylym depýtaty Sanıa Altaevaǵa aýdandyq máslıhattyń Qurmet gramotasyn tabystady.
