Baızaq aýdany Sarykemer aýylyndaǵy №2 balalar men jasóspirimder sport mektebi janynan shaǵyn fýtbol alańy paıdalanýǵa berildi. Jańa alańnyń ashylýyna oraı, kishi fýtboldan Jambyl oblysynyń aýyl jasóspirimderi jazǵy oıyndaryna arnalǵan fýtbol týrnıri uıymdastyryldy.
Zaman talabyna saı salynǵan shaǵyn fýtbol alańynyń saltanatty ashylý rásimine aýdan ákiminiń orynbasary Dáýir Dáýletov, aýdan ákimdigi dene shynyqtyrý jáne sport bóliminiń basshysy Ádilhan Omarov, №2 balalar men jasóspirimder sport mektebiniń dırektory Aslan Aıtbekov qatysty.
Dáýir Rysbaıuly quttyqtaý sózinde: “Sizderdi búgingi ashylyp otyrǵan shaǵyn fýtbol alańynyń ashylýymen jáne kishi fýtboldan Jambyl oblysynyń aýyl jasóspirimderi jazǵy oıyndaryna arnalǵan fýtbol týrnırimen quttyqtaımyn. Halqymyz ejelden densaýlyqtyń qadirin jete túsinip, ony basty baılyqqa balaǵan. Osy qaǵıdany berik ustanǵan memleketimiz el halqynyń oıy sergek, deni saý bolýy úshin qolda bar múmkindiktiń barlyǵyn jasaýda” - deı kele, dene shynyqtyrý men sporttyń damýyna jaǵdaı jasaý maqsatynda, aǵymdaǵy jyly “Aýyl - el besigi” jobasy aıasynda, jalpy quny 21 mıllıon 107 myń teńgeni quraıtyn eki kishi fýtbol alańy el ıgiligine berilgenin atap ótti. Aýdan aýmaǵynda osyndaı qalyptaǵy Qyzyl juldyz, Jetibaı, Baızaq, Dıhan, Sarykemer aýyldarynda kishi fýtbol alańshalary salynǵanyn, keler jyly Jambyl oblysy sport nysandarynyń qurylysyn júrgizý kartasyna sáıkes, Túımekent jáne Býryl aýyldarynda dene shynyqtyrý - saýyqtyrý keshenderin salý josparlanýda ekenin jetkizdi. Sondaı-aq, týrnır qatysýshylaryna sáttilik tiledi.
Sonymen, Qazaqstan Respýblıkasynyń memlekettik Gımni shyrqalyp, ulttyq dárejedegi tóreshi Asqat Abdambaev jarystyń erejesimen tanystyrǵan soń, 2003-2004 jyly týylǵan jasóspirimder arasynda shaǵyn fýtboldan týrnır bastalyp ta ketti. Shý, Sarysý, Jambyl, Moıynqum, Qordaı, Merki, T.Rysqulov, Jýaly jáne bizdiń aýdannan jasaqtalǵan komandalar eki topqa bólinip, oıyn órnegin qyzdyrdy. Sarykemer aýylyndaǵy №2 balalar-jasóspirimder sport mektebiniń jattyqtyrýshylary Alekseı Paı, Ermek Dıhanov, Ermek Talıpov baýlyǵan bizdiń aýdannyń komandasy qarsylastardy shań qaptyryp, júldeli birinshi orynnan kórindi.
Jeńimpazdar men júldegerler uıymdastyrýshylar taǵaıyndaǵan Dıplom, Kýboktarmen marapattalsa, jeńimpaz komanda Qazaqstan Respýblıkasynyń Aýyl jasóspirimderiniń jazǵy oıyndaryna beriletin joldamaǵa ıe boldy.
