Tilsiz jaýdyń qaı tustan tap beretinin de tap basyp aıtý múmkin emes. Mundaı sátte buqara bar senimdi qutqarýshylarǵa artyp, atalmysh sala mamandarynan kómek kútetini daýsyz. Al bul beıbit kúnniń batyrlarynyń kózsiz erligin sózben aıtyp jetkizý múmkin emes. Muny Memleket basshysy Qasym-Jomart Toqaev ta halyqqa arnaǵan Joldaýynda basa aıtqany belgili. Búginde Jambyl oblystyq Tótenshe jaǵdaılar departamentiniń de halyq úshin etken eńbegi men erligi ushan-teńiz dep jazady Qamshy.kz aqparat agenttigi. Departament basshysy Baǵdat Danılovtyń sózine súıensek, sala boıynsha esepti kezeńde barlyq baǵyttar boıynsha oń dınamıka saqtalypty. Tek órt oqıǵasy boıynsha byltyrǵy jylǵa qaraǵanda 30-35 fakti artyq oryn alǵan. - Esterińizde bolsa jyl basynda №9 yqshamaýdanynda gaz jarylysy tirkeldi. Sondaı-aq №5 yqshamaýdanyndaǵy kópqabatty úıdiń shatyry órtke orandy. Bul eki oqıǵada qaýipsizdik sharalary saqtalmaǵanynan oryn alyp otyr. Máselen №5 yqshamaýdanyndaǵy jaǵdaıda mysalǵa alsaq, atalmysh úı jańǵyrýdan ótken kezde qurylysshylar onyń shatyryndaǵy burynǵy qara qaǵazdy sypyryp alyp tasmaǵan. Sonyń saldarynan órt tez órship, ony sóndirý qıyndyqqa soqty. Odan bólek, shomylý maýsymynyń da ózindik qıyndyqtary boldy. Ásirese jasóspirimderdiń sýǵa batý faktileri janymyzǵa batty. Oblys ákimi Asqar Myrzahmetovtiń qaýlysy boıynsha óńirdegi eń qaýipti degen 15 sý aıdynynda saqtyq sharalaryn kúsheıtsek te, adamdardyń qaza tabý oqıǵalarynyń aldyn ala almadyq. Tipti jaz mezgilinde baseınderge deıin bilim berý syndy salalardyń mamandaryn baqylaýǵa jumyldyrsaq ta, qaıǵyly oqıǵalar tirkeldi. Árıne biz qansha jerden baqylaýdy kúsheıtip, jan salyp jumys jasap jatsaq ta, adam ólimi oryn alǵannan keıin synnyń astynda qalyp jatamyz. Ol orynsyz deı almaımyn. Sebebi adam ómirin ajaldan arashalaý bizdiń mindetimiz. Biraq qara halyqta biz de et pen súıekten jaratylǵanymyzdy, qyzmetimizdiń qanshalyqty qıyn da, jaýapkershilik júgi aýyr ekenin túsinse eken deımin, - deıdi Baǵdat Jumauly.

Qalaı degende de Tótenshe jaǵdaılar departamentiniń eńbekteri sózsiz eren. Erlikteri óz aldyna bir tóbe. Buny búginde qalyń buqara kózben kórip, tirlikterine myń alǵys aıtýda. Alǵys arqalaǵandar alysqa baratyndyǵy taǵy aıqyn.