Ekinshi dúnıejúzilik soǵysqa KSRO quramyndaǵy otar el retinde Qazaqstan jaýyngerleri de qatysqany belgili. Nemis basqynshylaryna qarsy kúreste qazaq batyrlary erliktiń eren úlgisin kórsetedi. Jastyǵyn soǵysqa urlatqan olardyń qaı-qaısysy da batyr atanýǵa laıyqty edi. Dese de erliktiń eren úlgisin kórsetsede bul marapatty berý usynylǵan 133 maıdangerge marapaty túrli jeleýmen berilmeı qalǵan. Olardyń qatarynda 8 jambyldyq maıdanger de bar, dep jazady Qamshy.kz aqparat agenttigi. 

Jalpy Keńes Odaǵynyń batyry ataǵy 615 qazaqstandyqqa buıyrsa, mundaı eń joǵary memlekettik nagradaǵa 28 jambyldyq ıe bolǵan. Degenmen Uly Otan soǵysy kezinde de bul marapatty berýdiń óz saıasaty bolǵany eshkim jasyryn emes. Máskeý túbindegi urystarda atoı salyp, san ret nemis qorshaýynda qalǵan jaýyngerlerin din aman alyp shyqqan áskerı strateg, bilikti ofıser, eń bastysy Baýyrjan Momyshulyna bul ataqtyń soǵys aıaqtalǵan soń 40 jyldan keıin berilgeni onyń birbetkeıligimen jáne tegin orysshalamaýy sebep bolǵany aıtylady. Sol sekildi qan maıdanda jeńis týyn jelbiretý jolynda janqıarlyq erlik kórsetken 8 jambyldyq bul marapatqa usynylǵanymen onymen nagradtalmaǵan.

Oblystyq arhıv qyzmetkerleri maıdan dalasynda el úshin etken eńbegi eskerýsiz qalǵan 8 jambyldyq maıdanger jaıyndaǵy málimetterdi jarıa etti. Olardyń 3-eýiniń sýreti tabyldy. Taǵy 4 maıdanger jaıyndaǵy málimetter arhıv qoryndaǵy materıaldar negizinde túzildi. Al qalǵan 4 maıdangerdiń aty jónimen maıdanǵa attandyrylǵan áskerı bólimnen ózge málimetter qupıa kúıinde qalyp otyr. Nemis basqynshylaryna qarsy kúreste atoı salyp, eń joǵary nagradaǵa usynylǵanymen oǵan qol jetkize almaı qalǵan Shahan Alıshev Shý aýdany, Tóle bı aýylynyń týmasy, al Abdýrahman Kargýlın, Sýltan Mamatalıev, Tashan Ramazanovtar áskerge Jambyl aýdandyq áskerı bóliminen shaqyrylǵan eken. Tashan Ramazanovtyń urpaqtary qazir Merki aýdanynda turady. Sondaı-aq soǵystan din aman oralyp beıbit kúnde ustazdyq qyzmet jasaǵan baızaqtyq Ýmbetkýl Djıenbekov te Keńes odaǵynyń batyry atana almaı qalǵan. Munan bólek shýlyq Mýsabek Aıtkýlov, Sýltanbaı Iskakovtar men qordaılyq Ýrgalbaı Ýmıkeev te KSRO jaýyngerlerine beriletin eń joǵary nagradaǵa ıelik ete almaı qalǵan.

Jalpy oblystyq arhıv qyzmetkerleri 7 jyldan beri Uly Otan soǵysy tarıhyna qatysty zertteý jumystaryn júrgizip keledi. Jáne bul zertteýler nátıjesiz emes. Ótken jyly jańǵyrǵan «Jeńis» saıabaǵyndaǵy «Erlik» memorıaldy keshenine dál osy zertteý jumystary kezinde aty belgili bolǵan jambyldyq maıdangerlerdiń esimderi jazyldy.