Túrkistandaǵy abattandyrý jumystary júzege asyp jatqan “Gúlder saıabaǵynyń” irgesinen sháınek úlgisindegi sýburqaq iske qosyldy dep jazady Qamshy.kz aqparat agenttigi "Otyrar" portalyna silteme jasap.

Ulttyq oıýmen órnektelgen sháınekten kesege quıylǵan sháıdiń kórinisin birden ańǵarýǵa bolady. Kreatıvti dúnıe arly-berli ótkenniń tańdanysyn týyndatyp jatqany da jasyryn emes.

Túrkistan qalasynyń jazǵy klımaty óte ystyq bolǵandyqtan, turǵyndar boıusynsa da, kelýshilerdiń árdaıym kóńili aýatyn qubylysy – aýa-raıy. Sondyqtan da, demalys oryndaryn jandandyrýdy kózdegen rýhanı mekende mindetti túrde sýburqaqtar sany artatyn bolady. Nátıjesinde, boı sergitip otyrýǵa kelgen turǵyndarǵa jaılylyq pen yńǵaılylyq syılaıdy.
⠀
Aıta keteıik, bul joba qala ákimi Rashıd Aıýpovtyń bastamasymen iske asyp otyr. “Túrkistan jaryq-tazalyq” JSHS merdigerlik etken erekshe sýburqaq dástúrge saı, zamanaýı ári elimizde alǵash ret boı kóterdi. Mystan jasalǵan jańa fontannyń bıiktigi 6 metr, al eni 7 metrdi quraıdy. Qaǵaz betine túsirilgen tyń dúnıeni úılestirýde 15 jumysshy qyzmet etti. Jaqyn arada tolyqtaı aıaqtalyp, túngi ýaqytta túrli túske enip, keshki qalanyń ajaryn aıshyqtaı túspek.