Elbasy Nursultan Nazarbaev: «Bolashaqqa baǵdar: rýhanı jańǵyrý» atty baǵdarlamalyq maqalasynda aldymyzǵa qoıǵan bıik maqsatqa jetý úshin bizdiń sanamyz isimizden ozyp júrýin, ıaǵnı odan buryn jańǵyryp otyrýyn, ol úshin bolashaqqa qalaı qadam basatynymyz jáne buqaralyq sanany qalaı ózgertetinimiz týraly kózqarasyn ortaǵa salǵan bolatyn. Sondaı-aq, ulttyq mádenıet – bul bizdiń ulttyq kodymyz ekenin aıtqan edi. Al ulttyq mádenıetimizdi jas urpaqtyń boıyna sińiretin úlken shańyraqtyń biri – aýyl-aýyldaǵy óner mektepteri. Boıynda ónerge degen qyzyǵýshylyǵy bar balanyń barlyǵy alǵash bilimin osy óner mektebinen alady.

Balalardyń boıyna ulttyq ónerge degen súıispenshilik dánin seýip otyrǵan bilim ordalarynyń biri – Jýaly aýdanyndaǵy №1 Balalar óner mektebi.

Óner mektebiniń irgetasy 1950 jyly qalanǵan. 1971 jyly mýzyka mektebi bolyp ashylǵan. 1993 jyldan bastap Balalar óner mektebi bolyp qaıta quryldy. Óner mektebinde 2019-2020 oqý jylynda 1141 bala tárbıe-bilim alýda. Ústimizdegi jyldyń qańtar aıynan bastap Kúreńbel orta mektebiniń bazasynan óner mektebiniń №1 fılıaly ashyldy. Sol sebepten 200 bala qosymsha qosyldy. Barlyǵy 1141 balany qurap otyr. Onyń 34-i ózge ult ókilderi.

Mektepte 46 muǵalim eńbek etedi. Balalardyń ónerge degen qyzyǵýshylyǵy jyl sanap artyp keledi. Oqýshylar eki aýysymda oqıdy. Mektepte 10 úıirme bar. Olar: dombyra, baıan, akordeon, fortepáno, gıtara, teatr, horeografıa, sándik qoldanbaly óner, kórkemsýret, estradalyq án.

Óner mektebiniń ustazdarynan quralǵan fólklorlyq ansámbl, vokaldi-ınstrýmentaldi ansámbl aýdandyq úlken is-sharalarda únemi óner kórsetip keledi. Kásibı mamandardyń ónerge baýlyǵan shákitteri de elimizdegi óner juldyzdaryn tárbıeleıtin arnaýly jáne joǵary oqý oryndarynda bilimderin shyńdap, eńbek etýde.

Mektep shákirtteri jyl saıyn túrli oblystyq, respýblıkalyq, halyqaralyq baıqaýlarǵa qatysyp, júldeli oryndardy ıelenip keledi. Máselen, ótken oqý jylynda «Biz baqytty balamyz!» atty respýblıkalyq án-bı baıqaýynda «Juldyzaı», «Qazyna» bı toptary İ oryndy ıelense, Gúlim Meıirhan bas júldeni jeńip aldy. İİ respýblıkalyq «Daraboz Jýaly» baıqaýynda «Murager» dombyrashylar ansambli, «Shabyt» teatr toby, Ásel Ábilhaıyrova, «Qazyna» bı toby, Erjan Ámınov, Baýyrjan Hoja-Ahmedov jáne «Tumar» bı toby İ oryndy ıelendi. İ respýblıkalyq «Talantty Qazaqstan» óner baıqaýynda Arslan Juman bas júldeni jeńip alsa, «Úrker- 19» respýblıkalyq baıqaýynda ártúrli nomınasıalar boıynsha bes oqýshy İ oryndy ıelendi. Sonymen birge oblystyq, aýdandyq deńgeılerdegi baıqaýlarda da kóptegen shákirtteri top jardy.