Nazarbaevqa hat jazǵan «Shyndyq ekspedısıasy» bılik organdaryn sotqa bermek

/uploads/thumbnail/20170708190209971_small.jpg

Keshe, ıaǵnı 14-shildede Astana qalasynda «Shyndyq ekspedısıamyn» uıymdastyrýshylar Prezıdentke, Úkimet jáne Parlament basshylaryna arnaıy hat joldap, birneshe talap qoıdy. «Shyn sóz» dep atalǵan hatqa 14 qoǵamdyq uıym, 211 jeke tulǵalar qol qoıǵan.

Hat jazǵan belsendiler óz hattaryna bir aı kóleminde jaýap almasa bılik organdaryn sotqa beretinin málimdedi.

Shyndyq izdeýshilerdiń jumysyna ádettegideı polısıa qyzmetkerleri kedergi jasaýǵa tyrysyp baqty.

Hattyń mátini tómendegideı:

Qazaqstan Respýblıkasynyń Prezıdenti-Elbasy

Nursultan Nazarbaevqa

Qazaqstan Respýblıkasynyń Premer-mınıstri

Kárim Másimovke

Qazaqstan Respýblıkasy Parlament Senatynyń tóraǵasy

Qasymjomart Toqaevqa

Qazaqstan Respýblıkasy Parlament Májilisiniń tóraǵasy

Qabıdolla Jaqypovqa

SHYN SÓZ

«Shyndyq ekspedısıasy» 2015-jyldyń 17-26-maýsymy aralyǵynda Aqmola, Qostanaı, Aqtóbe oblystarynyń jeti aýdanyn aralap, kıik, mal, ańdar men qustar qyrylǵan aımaqta bolyp, barlyq mán-jaıǵa qanyq bolyp qaıtty.

Ekspedısıa qorytyndysy boıynsha mynandaı shyndyqtardyń beti ashyldy:

1. Qazaqstan aýmaǵynda osy jyldyń 10- mamyrynan bastap 134 myń kıik qyryldy degen resmı aqparat taratylǵan edi;

Alaıda qyrylǵan kıikterdiń shynaıy sany 150 myńnan asady.

2. QR Investısıalar jáne damý mınıstrliginiń Aeroǵarysh komıteti jáne oǵan qarasty «Ǵarysh-ekologıa» mekemesi basshylary Qostanaı jáne Aqtóbe oblystaryna Proton zymyranynyń bólshekteri qulamaıdy dep málimdegen edi;

Shyndyǵynda, sońǵy bes jyl boıy Qostanaı oblysynyń Amangeldi, Jangeldın aýdandarynyń, Aqtóbe oblysynyń Yrǵyz aýdanynyń aýmaǵyna Proton zymyranynyń bólikteri udaıy qulaıtyny dáleldendi.

3. Oblystarda oryn alǵan mal shyǵynynyń da sany taratylǵan resmı aqparatta kórsetilgen sannan álde qaıda kóp ekeni anyqtaldy;

Máselen, Qostanaı oblysy, Jangeldın aýdanyndaǵy «Syma-K» sharýa qojalyǵynda kıik qyrǵyny bastalǵannan keıin on kún ishinde 67 bas mal qyrylǵany, onymen kórshiles «Qazymbek» sharýashylyǵynan 9 bas mal shyǵynynyń bolǵany, Aqtóbe oblysy, Áıteke bı aýdanyna qarasty «Qumqudyq» seriktestiginde 35 jylqynyń ólgeni anyqtaldy. Budan basqa da kóptegen mal shyǵyndary týraly aqparattar rastaldy.

4. Proton zymyranynyń ushyrylýy, qulaýy, Reseı Federasıasy áskerı polıgondaryndaǵy túrli synaqtar Qazaqstan halqynyń densaýlyǵyna keri áser etip jatqany anyqtaldy. El arasynda túrli isik, qan tamyr, júrek, tynys joldary aýrýlarynyń artyp otyrǵany belgili boldy;

5. Proton zymyrany ushyrylyp, áskerı synaqtar bolǵannan keıin jergilikti jerlerde aýa-raıynyń kúrt ózgeretini anyqtaldy. Bul óz kezeginde jergilikti turǵyndardyń mal ósirip, egin egý jaǵdaıyna keri áserin tıgizýde.

Osy atalǵan jaǵdaılardy eskere otyryp:

1. «Baıqońyr» ǵarysh aılaǵynan Proton zymyranyn ushyrýdy tez arada múlde toqtatýdy;

2. Qazaqstan aýmaǵyndaǵy barlyq áskerı-jattyǵý polıgondaryn jabýdy;

3. Osyǵan deıin Proton zymyranynyń bólshekteri qulaǵan, áskerı synaq júrgizilgen aımaqtardaǵy turǵyndardyń densaýlyǵyna tolyqtaı tekserý júrgizýdi jáne zardap shekkenderge ótemaqy taǵaıyndaýdy;

4. Proton zymyranynyń ushyrylýynan, áskerı qarýlar synaýdan qorshaǵan ortaǵa kelgen zıan kólemin tolyqtaı anyqtaýdy;

5. QR Ekologıalyq kodeksine sáıkes Reseı Federasıasynan Proton zymyranynyń ushyrylýynan, áskerı qarýlar synaýdan adam densaýlyǵyna jáne qorshaǵan ortaǵa tıgizgen zıany men qaýpin anyqtap, baǵalap, soǵan sáıkes ótemaqy kólemin anyqtaýdy jáne ol ótemaqynyń tez arada tólenýin talap etýdi uıymdastyrýdy;

6. 2013-jyldyń 02-shildesinde «Baıqońyr» ǵarysh aılaǵynda Proton zymyranynyń qulaýynan bolǵan zardaptar úshin ótemaqy retinde Reseı Federasıasy tóleýge mindettelgen 90 mln. dollardy tez arada alyp, kıiktiń, maldyń jappaı qaralý sebebin anyqtaý men zardap shekkenderge ótemaqy retinde berýdi;

7. Qyrylǵan 150 myń kıiktiń, júzdegen maldyń, ańdar men qustardyń jappaı qyrylǵany úshin naqty laýazym ıelerin jaýapqa tartýdy, onyń ishinde elimizdegi ekologıa men qorshaǵan ortany qorǵaýǵa tikeleı jaýapty QR Energetıka mınıstri Vladımır Shkolnıkti, ǵarysh salasyna tikeleı jaýapty QR Investısıa jáne damý mınıstri Áset Isekeshevti laýazymdyq qyzmetinen bosatýdy;

8. Ekspedısıa jumysy aıaqtalǵan soń da resmı aqparat boıynsha Qostanaı oblysynda 3 myńnan asa mal óldi. Ońtústik Qazaqstan oblysynyń Saryaǵash, Shardara, Arys, Otyrar aýdandarynda mal ólip jatyr degen habar aldyq. Keıbir sharýa qojalyqtarynda 500ge deıin qoı, eshki qyrylǵan. Osynyń báriniń sebebin anyqtap, halyqqa resmı túrde jarıalaýdy talap etemiz.

Osy atalǵan máseleler boıynsha naqty sharalar uıymdastyryp, sheshimder qabyldaýlaryńyzdy jáne QR «Ákimshilik rásimder týraly» zańynyń 16-babyna, QR «Jeke jáne zańdy tulǵalardyń ótinishterin qaraý tártibi týraly» zańynyń 8 babyna sáıkes jaýap berýińizdi talap etemiz.

Qol qoıǵan jeke tulǵalar tizimi qosa berilip otyr. 5 bet.

«Antıgeptıl» azamattyq

qozǵalysynyń úılestirýshisi Maqsat Nurypbaı

«Jalpyulttyq sosıal-demokratıalyq

partıasynyń» Astana qalasy boıynsha

fılıalynyń basshysy Asqat Rahymjanov

«Halyqaralyq ekologıa akademıasy»

mekemesiniń prezıdenti Musaǵalı Dýambekov

«Naǵyz jeltoqsan»

qoǵamdyq qorynyń prezıdenti Qurmanǵazy Rahmetov

«Jemqorlyqqa qarsy halyqtyq

komıteti»qoǵamdyq qoryniń prezıdenti Musaǵalı Dýambekov