Búginde Jambyl oblysynda óńdeýshi kásiporyndardyń qýattylyǵy artyp keledi. Bul oraıda olardyń ónimderine degen naryqtaǵy joǵary suranysty da atap ótken jón. 9 jyl buryn Moıynqum óńirinde qurylǵan «Myńaral» sementi búginde qurylys materıaldary naryǵynda jetekshi kásiporyn sanalady, dep jazady Qamshy.kz aqparat agenttigi. 

Bul ınvestısıalyq jobaǵa fransıalyq kompanıa 350 mıllıon AQSH dollar kóleminde quıylǵan. Kásiporynnyń ónimderi jergilikti turǵyndardyń kúndelikti suranysyn qamtamasyz etýmen birge «EKSPO-2017» halyqaralyq mamandandyrylǵan kórmesindegi qurylys nysandaryn soǵý kezinde paıdalanyldy. Kompanıa negizinen naryqqa suranysyna saı sementtiń «M400 D20», «M500 D0» markalaryn óndirýmen aınalysady. Mundaǵy óndiristik úderiste tolyqtaı jańa tehnologıalar qoldanylady. Sonyń esebinen «Myńaral» sement zaýyty óz ónimderin qosymsha kúıdirý men «qurǵaq» óndirý ádisi shyǵaratyn birden-bir kásiporynǵa aınaldy. Qazir ónimdi ótkerý maqsatynda zaýyt basshylyǵy halyqaralyq avtodáliz ben temir jol torabynyń múmkindigin molynan paıdalanyp otyr.

Kásiporynda óndirilgen sement negizinen Qyrǵyz, Ózbekstan Respýblıkalaryna eksporttalady. Ónimderdi tasymal isinde kompanıanyń zamanaýı úlgide jabdyqtalǵan transporttyq parki kádege jaraıdy. Bul parkte qazir daıyn ónimdi tasymaldaýǵa arnalǵan 370 hopper vagony bar.

–Zaýytta 300 adam turaqty jumys ornymen qamtylǵan. Taıaý arada ónidiristik baza mańynan daıyn ónimdi Astana qalasyna ótkerý boıynsha jumys jasaıtyn jańa temir jol termınalynyń qurylysy júrgiziledi. Sol arqyly Myńaraldyń sementi elimizdiń ár aımaǵyndaǵy qarqyn alǵan qurylys alańdaryna jóneltilmek,–deıdi «Myńaral Tas kompanı» jaýapkershiligi shekteýli seriktesiginiń bas dırektory Murtaza Bultaı.

Zaýyttyń Moıynqum dalasynda ornalasýynyń da ózindik sebepteri bar. Óıtkeni munda sement óndirisine qajetti shıkizat sanalatyn ák tasy men saz balshyqty taqtatastyń mol qory kezdesedi.

Alǵashynda jylyna 11 mıllıon tonna sement shyǵarýǵa eseptelgen zaýyttyń óndiristik qýattylyǵy 40 paıyzǵa ulǵaıtyldy. Tek ótken jyldyń ózinde kompanıanyń eksporttyq áleýeti aldyńǵy jyldarmen salystyrǵanda 218 paıyzǵa ósýi sózimizge dálel.Búginde kásiporyn Vicat kompanıasyna enshililes 15 zaýyttyń ishinde úzdik óndiris oshaǵynyń birine aınalyp otyr.