Qazaqstan prezıdenti Qasym-Jomart Toqaev óziniń kúıeý balasy Temirtaı İzbastındi Qazaqstannyń Bolgarıadaǵy elshisi etip taǵaıyndady. Bul týraly Aqorda saıty habarlady.

"Memleket basshysynyń jarlyǵymen Temirtaı Rymtaıuly İzbastın Qazaqstannyń Bolgarıadaǵy tótenshe jáne ókiletti elshisi qyzmetine taǵaıyndaldy" delingen Aqordanyń habarlamasynda.

Azattyq Radıosynyń jazýynsha, Temirtaı İzbastın - Qasym-Jomart Toqaevtyń qaryndasy Qarlyǵa İzbastınanyń kúıeýi. Ol 2009 jyly Qazaqstannyń Bolgarıadaǵy dıplomatıalyq ókildiginiń jetekshisi bolyp taǵaıyndalǵan. Dıplomatıa salasynda 1994 jyldan beri qyzmet atqaryp keledi. 2013 jyly Kapital.kz saıty Toqaevtyń uly Tımýr jáne İzbastınniń uly Muhamed Atyraý oblysynda shıkizat ıgerýmen aınalysatyn "Abı Petroleým Kepıtal" munaı kompanıasynyń quryltaıshylary ekenin jazǵan.

Prezıdent Toqaev Qazaqstannyń taǵy da basqa elderdegi elshilerin de aýystyrdy.  

Aqordanyń habarlaýynsha, Shahrat Nuryshevtiń ornyna Qazaqstannyń Qytaıdaǵy elshisi bolyp Ǵabıt Qoıshybaev taǵaıyndalǵan. 47 jastaǵy Qoıshybaev buǵan deıin prezıdent ákimshiliginiń syrtqy saıasat jáne halyqaralyq baılanys bólimi jetekshisiniń orynbasary bolǵan.

Toqaevtyń jarlyǵymen Qazaqstannyń Latvıadaǵy elshisi bolyp Tımýr Pirimbetov taǵaıyndaldy.