Ataýly áleýmettik kómekke ıe bolý maqsatynda Qazaqstanda 74 myń otbasy óz kiristerin jasyrǵan. Bul týraly QR Eńbek jáne halyqty áleýmettik qorǵaý mınıstri Birjan Nurymbetov málim etti – dep Qamshy.kz aqparat agenttigi habarlaıdy, Elorda Info-ǵa silteme jasap.

"Bıylǵy sáýir aıynan bastap ataýly áleýmettik kómekti tóleý júıesi ózgerdi, kólemimen qatar alýshylardyń da sany artty. Bizde barlyǵyn aqparattyq júıe avtomatty túrde anyqtaıdy. Iaǵnı AÁK alýshy tek qana ótinish jazady, qalǵanyn aqparattyq júıe ózi anyqtaıdy. Biz júıe arqyly óz kiristerin jasyrǵan 74 myń otbasyny anyqtadyq", – deıdi Birjan Nurymbetov Úkimet otyrysynda.

Mınıstrdiń málimdeýinshe, olardyń qatarynda jaqsy úıleri men avtokólikteri bar AÁK alýshylar da bolǵan.

"Sebebi olarda rasymen de resmı túrde kiris joq. Bul durys emes, siz 2 qabatty kotejińiz bolyp turyp AÁK alasyz, al naǵyz kómekke muqtaj otbasy járdemaqysyz qalýda. Osyǵan oraı biz ýchaskelik komısıanyń jumysyn kúsheıtetin bolamyz. Olar barlyǵyn tekserip, siz AÁK-ti ala almaısyz dep aıtýy tıis. Biz ýchaskelik komısıa jumysyn barlyǵyn tekserip úlgere alatyndaı etip zańdastyratyn bolamyz. AÁK otbasylyq tabysy joq, kómekke muqtaj jandarǵa tólenýi tıis. Bul járdemaqy elimizde 2002 jyldan bastap tólenip keledi. Qazirgi tańda AÁK boıynsha jańa zań jobasy Májilistiń qaraýyna usynyldy. Kelesi jyldan bastap AÁK tóleý júıesi ózgertiledi", –dedi Mınıstr.