Belsendi Janbolat Mamaı quraıyn dep otyrǵan demokratıalyq partıanyń bastamashyl top ókilderi Aqtóbedegi jaqtastaryna "qysym jasalǵanyn" habarlady. Buǵan deıin Mamaı bastaǵan bastamashyl top ókilderi Qazaqstannyń batys óńirin aralap, partıaǵa adam jınaıtynyn habarlaǵan, biraq Mamaıdyń ózi "probasıalyq baqylaý qyzmetiniń tyıymyna" baılanysty bul sapardan qalyp qalǵan dep jazady Qamshy.kz aqparat agenttigi Azattyqtyń deregin negizge alyp. 

Bastamashyl top múshesi Inga Imanbaıdyń aıtýynsha, 5 qarashada Aqtóbedegi kezdesý qarsańynda oblys ákimdigi jergilikti belsendi Baqyt Janshaevaǵa "qysym jasaǵan". Muny Baqyt Janshaevanyń ózi de rastap otyr.

- Aqtóbe oblysy ákiminiń orynbasary Marat Toǵjanov pen oblystyq ishki saıasat basqarmasynyń basshysy Bulbul Eleýsinova ákimdikke shaqyryp alyp, úsh saǵattaı ustady. Azamattyq pozısıam men belsendiligime qatysty saýaldar qoıdy. Mamaıdyń partıasy týraly surady. "Osyndaı isterdiń basy-qasynda únemi júresiz. Onyń bári doseńizge jazylady, bala-shaǵyńyz bar" dep eskertti, - deıdi Baqyt Janshaeva.

Inga Imanbaı "osydan bir kún buryn Oral qalasynda bolyp, partıa qurý úshin myń adamnan qol jınadyq. Jaqtastarymyzdyń kóbeıgenin kórgen bılik alańdaı bastady" deıdi.

Al Aqtóbe oblysy ákiminiń orynbasary Marat Toǵjanovtyń sózinshe, Baqyt Janshaeva ákimdikke ózi basqaratyn "Úsh taǵan" jýrnalynyń sharýasymen barǵan.

- Basqa aıtarym joq, men eshkimge qysym jasaǵan emespin, - dedi Marat Toǵjanov.

Aqtóbe oblystyq ishki saıasat basqarmasynyń basshysy Bulbul Eleýsinova da "belsendige qysym jasaldy" degen tujyrymdy joqqa shyǵaryp otyr.

- Baqyt Janshaevanyń azamattyq pozısıasy men qoǵamdyq belsendiligine ákimdik kirisken emes. Ol óz sharýasy. Biz onymen "Úsh taǵan" jýrnalyna jazylý barysy, qarjylandyrý máselesi týraly ǵana sóılestik, - dedi Bulbul Eleýsinova.

Birneshe apta buryn belsendi Janbolat Mamaı Qazaqstanda jańa opozısıalyq partıa quratynyn málimdep, bastamashyl top qurylǵanyn habarlaǵan. Eki jyl buryn shartty jazamen bosatylǵan belsendi ótken apta sońynda probasıa qyzmetiniń tyıymyna baılanysty Almaty qalasy aýmaǵynan shyǵa almaı otyrǵanyn da aıtqan.

Buryn táýelsiz "Trıbýna" gazetin basqarǵan jýrnalıs, qoǵam belsendisi Janbolat Mamaı "Muhtar Áblázovtan qarjy aldy" dep aıyptalyp, shartty jazamen bosatylǵan. Sot oǵan úsh jyl jýrnalısik qyzmetpen aınalysýǵa tyıym salǵan. Janbolat Mamaı ózine taǵylǵan aıypty moıyndamaǵan.