Halyqaralyq is-sharaǵa Qazaqstan Respýblıkasy Premer-Mınıstriniń orynbasary Berdibek Saparbaev, Mádenıet jáne sport vıse-mınıstri Órken Bısaqaev pen Jambyl oblysynyń ákimi Asqar Myrzahmetov, Halyqaralyq Túrki akademıasynyń prezıdenti Darhan Qydyráli, ǵalymdar, mádenıet jáne bilim salasynyń qyzmetkerleri, JOO oqytýshylary men BAQ ókilderi qatysýda.

«Bıyl 24 tamyzda «Ulytaý – 2019» halyqaralyq týrısik forýmy kezinde Prezıdent Qasym-Jomart Toqaev Ulytaýda halyqaralyq deńgeıdegi etnografıalyq týrızm ortalyǵyn qurýdy tapsyrǵan edi. Atalǵan jospardy júzege asyrý maqsatynda 2020 jyly Altyn Ordanyń 750 jyldyǵy atap ótiledi. Osy oraıda daıyndalǵan keshendi josparǵa sáıkes ortalyq deńegeıinde 50-den astam merekelik is-shara ótedi. Bul qatarda otandyq jáne sheteldik ǵalymdardyń qatysýymen halyqaralyq ǵylymı konferensıa ótkizý, Altyn Ordanyń tarıhyna arnalǵan monografıalar men kitaptar shyǵarý, Ulytaý óńiriniń týrısik áleýetin ilgeriletý, arheologıalyq qazba jumystaryn júrgizý, derekti fılm shyǵarý qarastyrylýda. Sondaı-aq, Joshy han, Alasha han kesenesine ǵylymı-restavrasıalaý jumystaryn júrgizý, Altyn shoqy taýynyń tóbesindegi Ámir Temir jazýy bar memorıaldyq taqtanyń aýmaǵyn abattandyrý kózdelip otyr. Osy is-sharalar nátıjesinde elimizdiń mádenı murasyn jańǵyrtý úshin platforma qurylyp, Altyn Ordanyń tarıhı-mádenı murasyn nasıhattaýdy UNESCO men UNWTO-nyń halyqaralyq baǵdarlamasyna engizýge alǵyshart jasalmaq»,-dedi B. Saparbaev.

Konferensıa barysynda Talas quryltaıynyń jáne Altyn Orda memleketiniń 750 jyldyǵy, Júsip Balasaǵunnyń áıgili «Qutadǵý bilik» kitabynyń 950 jyldyǵyna oraı mazmundy baıandamalar jasalyp, qatysýshylar paıymdy pikirlerimen bólispek.