Semeıdiń medısına ýnıversıtetinde SHQO tilderdi damytý jónindegi basqarmasynyń uıymdastyrýymen "Úsh báıterek: taǵdyr men taǵylym" taqyrybynda oblystyq ǵylymı-tájirıbelik konferensıasy ótti.

Shara Alash qaıratkerleri S. Seıfýllın,  İ. Jansúgirov jáne B. Maılınniń 125 jyldyǵyna arnaldy. Maqsaty - qazaqtyń "úsh báıteregi" atanǵan qaıratkerlerdiń taǵylymyn, qazaq ádebıetin damytýdaǵy eńbekteriniń ereksheligin kópshilikke tanytý jáne latynnegizdi jańa álipbıdiń mańyzyn túsindirý. Konferensıaǵa ǵalymdar, zıaly qaýym ókilderi, memlekettik organdar men mekemeler qyzmetkerleri, stýdent jastar,  qoǵamdyq uıymdar qatysty. Shara barysynda qazaq ádebıetindegi alash ıdeıasy, úsh báıterektiń tulǵa retinde qalyptasýy jáne shyǵarmalarynyń ádebı-teorıalyq negizderi talqylanyp, usynystar usynyldy.

- Qazaq ádebıetiniń "úsh báıteregine" aınalǵan İlıas, Beıimbet, Sákenniń eńbekterin kúlli qazaq halqy jaqsy biledi. Olar qıyn da qıly zamanda jazýshylyqty jandaryna serik etip, qoǵam qaıratkerine aınala bilgen tulǵalar. Sonymen qatar, bıyl "Egemen Qazaqstan" gazeti 100 jyldyq mereıtoıyn atap ótti. Al, osy "úsh báıteregimizdiń" bul gazetpen ómir joldary tyǵyz baılanysty. Sol ýaqyttaǵy "Ushqyn", "Eńbek týy", "Eńbekshi qazaq"," Sosıalısik Qazaqstan" gazetteri bolyp, halyqtyń jaǵdaıyn jetkize bilgen gazet, búgingi kúni "Egemen Qazaqstan"  bolyp jumysyn jalǵastyrýda. Sáken men Beıimbet bul gazettiń alǵashqy redaktorlarynyń biri bolǵan edi. Úsh báıteregimiz de eńbek joldaryn osy gazetten bastaǵany da barshamyzǵa belgili.Sol sebepti ótken men búgingini ushtastyra otyryp konferensıa ótkizilýde, - dedi SHQO tilderdi damytý jónindegi basqarma basshysynyń mindetin atqarýshy Tólemisova Roza Áshimhanqyzy.