Oblys ákimi Asqar Myrzahmetovtiń tapsyrmasymen mektepterde oqýshylardyń qaýipsizdigin qamtamasyz etýdegi kemshilikterdi anyqtaý, onyń ishinde mektep ınspektorlary men beınekameralardyń jetispeýshiligi, oqý oryndarynyń aýmaǵynda qorshaýdyń, sanıtarlyq jabdyqtardyń bolmaýy jáne basqa da máseleler boıynsha Jambyl oblysynyń Polısıa departamentimen arnaıy jumys toby quryldy dep jazady Qamshy.kz aqparat agenttigi. Bul týraly Jambyl oblysy Polısıa departamentiniń bastyǵy Arman Orazalıev feısbýk jelisi arqyly habarlady. 

"Oblys ákimi Asqar Myrzahmetovtiń tapsyrmasymen mektepterde oqýshylardyń qaýipsizdigin qamtamasyz etýdegi kemshilikterdi anyqtaý, onyń ishinde mektep ınspektorlary men beınekameralardyń jetispeýshiligi, oqý oryndarynyń aýmaǵynda qorshaýdyń, sanıtarlyq jabdyqtardyń bolmaýy jáne basqa da máseleler boıynsha Jambyl oblysynyń Polısıa departamentimen arnaıy jumys toby quryldy.
Mektep janyndaǵy aýmaqtarda kámeletke tolmaǵandardyń jynystyq qol suǵylmaýshylyǵyna qarsy qylmystardy boldyrmaý boıynsha jumysty kúsheıtý maqsatynda, kúndizgi jáne keshki ýaqytta polısıa qyzmetkerleri mektep ákimshiliginiń ókilderimen birlesip patrúldeý uıymdastyrady.
Sondaı-aq mektep ınspektorlarynyń is-áreket algorıtmi qaıta qaraldy. Mekteptegi beınebaqylaý kameralarynan beınelerdi tek dırektordyń kabınetine ǵana emes, sonymen qatar dırektordyń tárbıe isi jónindegi orynbasary men mektep ınspektorynyń kabınetterine shyǵarý máselesi qaralýda.
Taraz qalasynyń №6 orta mektebinde oryn alǵan qylmysqa baılanysty Taraz qalasy Polısıa basqarmasynyń Jergilikti polısıa qyzmetiniń bastyǵyna, Taraz q. PB 2-polısıa bóliminiń jáne 2-PB jergilikti polısıa qyzmeti bólimshesiniń bastyqtaryna, 2-PB ıývenaldyq polısıa jumysyn uıymdastyrý jónindegi aǵa ınspektoryna qatań sógis jarıalandy, al mektep ınspektory ishki ister organdarynan shyǵaryldy.
Kámeletke tolmaǵandar jasaǵan jáne kámeletke tolmaǵandarǵa qatysty qylmystardyń aldyn alý men jolyn kesý máseleleri meniń kúndelikti baqylaýymda", - dep jazdy Arman Orazalıev óziniń feısbýk paraqshasyna. 

Eske salsaq, keshe 12 jastaǵy jasóspirimniń mektep ájethanasynda zorlanǵany anyqtaldy. Kúdikti barlyq beınebaqylaý kameralarynan anyq kórinip turǵan. Alaıda emin-erkin júrgen pedofılge eshkim mán bermegen.