«Rýhanı jańǵyrý» baǵdarlamasy aıasynda Jambyl oblysynda kóptegen ıgi jumystar júzege asyrylýda. Ásirese, aýyldan túlep ushyp, jetistikke jetken azamattardyń týǵan jerin umytpaı, ósken mekenine túrli syı-sıapat jasaýy kóptiń qoldaýyn tapty. Osy rette, jýyrda Qazaqstan sýretshiler odaǵynyń múshesi, qordaılyq qylqalam sheberi Ójet Núsipbaev Qarasaı aýylyndaǵy qazaq mektebine óziniń jańa týyndysyn tartý etti. Bul – dańqty baba Qarasaı batyrdyń maıly boıaýmen salynǵan beınesi.

Ójet Qazykeulynyń shyǵarmashylyǵy qordaılyqtarǵa kópten málim. Balalyq shaǵy Almalynyń tumsa tabıǵaty aıasynda ótken oǵan sýretshilik óner anasynan daryǵan. Ýázıpa ana on saýsaǵynan óneri tamǵan ismer, qolynan qaıshysy túspeı, búkil aýyldyń tekemet, syrmaq, tuskıizderine kózben-aq mólsherlep nebir ǵajap oıý-órnekterdi syzyp shyǵatyn edi. Ójet 1970 jyly Frýnzedegi kórkemsýret ýchılıshesin úzdik bitirip shyqty da, sodan beri júregi qalaǵan kásibinen qol úzgen joq. Sýret óneriniń jıvopıs, grafıka, terige bederlep beıne salý túrlerimen aınalysty. Únemi jańa obrazdar somdaýmen tyń  izdenis ústinde  júredi. Onyń qazirgi týyndylarynan ómirdiń  máni  týraly salmaqty  oılar  ańǵarylady. Basty  taqyryby «Uly dala», álemdegi  máńgi  qozǵalys pen  bitispes tartys. «Uly  dalanyń  sımvoly», «Dala  nyshany», «Jyl qustary», «Máńgúrt», «Túrli-tústi álem» t.b. ataýlarynan-aq  sýretshiniń aıtar oıyn bilýge  bolady. Onyń  ár  jyldarda Almaty,  Bishkek, Taraz  qalalarynda taqyryptyq kórmeleri ótken, birqatar týyndylary Túrkıa, Qytaı, Japonıa, Almanıa, Grekıa tárizdi  shetelderde jeke  koleksıalarda qoıylǵan. Ásirese, Tarazdyń 2000 jyldyǵyna, Qazaq handyǵynyń 550 jyldyǵyna jáne «Rýhanı  jańǵyrý» taqyrybyna arnaǵan «Jibek  joly», «Órkenıettiń  damýy», «Halyqtyń  rýhanı qazynasy» tárizdi shyǵarmalary  da kórermender men ónertanýshylar  tarapynan joǵary baǵasyn aldy.

Ójet Qazykeulynyń  qylqalamynan áli  de nebir ǵajaıyp týyndylar jasalýda. Ótken  jyly  «Rýhanı  jańǵyrý» baǵdarlamasy  aıasynda  Qarasaı  aýyldyq  ákimdiginiń  uıymdastyrýymen ótken  aýyl túlekterimen bolǵan  kezdesýge  barǵanda jańa salynǵan «Alaman báıge» kartınasyn tartý etti. Jerlesteri de qarap  qalmaı, munyń ıyǵyna shapan  jaýyp  qurmettedi. Sol kezdesýde ózi  bala  kezde bilim  alǵan baıyrǵy  qazaq  mektebiniń  ujymy bilim  ordasyna Qarasaı  batyrdyń úlken sýretin salyp  berýdi ótingen edi.  Mine, jerlesteriniń  bul tapsyrysy da sátimen oryndaldy.