Qoǵamdyq saıasat ınstıtýty qarasha aıynda júrgizilgen áleýmettik zertteý nátıjelerin jarıalady. Baspasóz-brıfıngi barysynda jýrnalıserge qoǵamdyq pikirdi baǵalaýdyń negizgi kórsetkishteri osy jyldyń tamyz aıyndaǵy kórsetkishtermen salystyra otyryp usynyldy. Sondaı-aq qazaqstandyqtar «Nur Otan» partıasynan ne kútetin týraly da sóz boldy dep jazady Qamshy.kz aqparat agenttigi. 

Instıtýt dırektory Iýlıa Kýchınskaıanyń málimdeýinshe, saýalnama qorytyndysy boıynsha «Nur Otan» partıasy birinshi kezekte baqylaýǵa alýy tıis aımaqtardaǵy eń negizgi 5 másele anyqtaldy. Atap aıtqanda, bul – jalaqyny kóterý, sybaılas jemqorlyqqa qarsy kúres, bilim berý jáne densaýlyq saqtaý salasyndaǵy máselelerdi sheshý, sonymen qatar, áleýmettik teńsizdikke qarsy kúres.

«Qarashada biz qoǵamdyq-saıası ahýal men naqty «Nur Otan» partıasyna degen pikirge kezekti ret zertteý júrgizdik. Saýalnamaǵa elimizdiń barlyq aımaqtarynyń respondentteri qatysyp, ol «face to face» (betpe-bet) túrinde júrgizildi. Partıa reıtıńisiniń dınamıkasyn zerdeleýge, onyń qyzmetin baǵalaýǵa, qazaqstandyqtardyń partıadan ne kútetindigine basty nazar aýdaryldy», - dedi Iýlıa Kýchınskaıa.

Onyń aıtýynsha, partıanyń jumysyn qaıta jandandyrý týraly habarlanǵannan beri arada az ýaqyt ótse de, saýalnamalar oń ózgeristerdi kórsetti. «Nur Otan»-nyń elektoraldyq reıtıńi 10% ósti.

«Júrgizilgen áleýmettik zertteýlerge súıene otyryp, eger partıa halyqpen dıalog ornatyp, turǵyndar aldynda únemi esep berip, tyń bastamalar kóterse jáne saılaýǵa qarapaıym halyqtyń óz ishinen shyqqan adamdardy usynatyn bolsa, qazaqstandyqtar «Nur Otan»-dy qoldaýǵa daıyn dep qorytyndy jasaýǵa bolady. Munyń barlyǵy Nursultan Nazarbaevtyń bastamasymen qolǵa alynǵan qaıta jandandyrý aıasynda, sońǵy birneshe aı boıy «Nur Otan» júzege asyryp kele jatqan negizgi baǵyttar. «Nur Otan»-nyń elektoraldyq reıtıńi 10% ósti. Tamyz aıynda saýalnamaǵa qatysqandardyń 55,3% saılaýda partıany qoldaýǵa daıyn bolsa, al qazir azamattardyń 65,8% «Nur Otan»-ǵa daýys berýge nıetti», - dedi ol.

Sonymen qatar, Iýlıı Kýchınskaıa «Nur Otan» partıasy azamattar óz quqyqtary buzylǵan jaǵdaıda shaǵymdanatyn top-5 ınstıtýttyń qatarynan oıyp oryn alǵanyn aıtty. Bul bestiktiń kóshin 45,4 paıyzben sot júıesi bastasa, al ekinshi orynda 27,2 paıyzben «Nur Otan» partıasy tur. Munyń ózi azamattardyń partıaǵa degen senimin kórsetedi.

«Jalpy, saýalnamaǵa qatysqan árbir úshinshi adam partıanyń jumysy sońǵy 6 aıda aıtarlyqtaı jaqsarǵanyn jetkizdi. Olardyń 41,8% partıa halyq úshin ózekti máselelerdi kóteredi dep esepteıdi. Bul sondaı-aq, aımaqtardaǵy jumys qarqynynyń artýymen de baılanysty. 14 qala men aýdanda partıanyń kadrlyq rezervine pılottyq rejımde irikteý júrgizildi. Barlyq eldi mekenderde túıitkildi máseleler men olardy sheshý joldarynyń kartasyn jasaý jumystary bastaldy. Qoǵamdyq qabyldaý bólmeleriniń, sybaılas jemqorlyqqa qarsy kúres, balalardyń, kóp balaly jáne az qamtylǵan otbasylardyń quqyqtaryn qorǵaý jónindegi partıalyq qurylymdardyń jumysyn kúsheıtý de nazardan tys qalǵan joq», - dep tolyqtyrdy Qoǵamdyq saıasat ınstıtýtynyń mamandary.