Almaty tilsiz jaýdan shoshyp oıandy. Jaý jaǵadan alǵanda kóp dúnıeni ańǵarýǵa bolady eken. Aldymen aqparattyń óte jyldam taraıtyndyǵyna taǵy br márte kózmiz jetti. Alaıda sol tarap jatqan aqparǵa ne nanaryńdy, ne senbesińdi bilmeı dal bolasyń. Qazaqstandyq BAQ-tyń jumǵan aýzy ashylmady. Esh jerde resmı málimdeme joq. Resmı málimdeme jasaýǵa asyqqan resmı oryndar da joq. Daýryqqan halyq bir-birine qaraıdy da «ınternet ne deıdi» dep qoıady. Internet ne deýshi edi? Arasynda Almatyǵa qatysy joq vıdeolardy salyp, onysyz da daýryqqan halyqty odan saıyn úreılendirip alýdy umytpaǵandar da aramyzdan tabylyp jatty. Shynaıy sýretterdi túsirip, qaladan shyǵyp ketýge keńes bergen hattar da kelip tústi. Tótenshe jaǵdaılar basqarmasyna da qarasha halyq múldem senim arta almaıdy eken. Oqıǵa ornyndaǵy adamdarǵa «aldymen bılik tarapynan resmı málimdeme jasalsyn da, daýryqpasańyzdarshy» dep jubatý aıtyp kórińizshi, sol jerde-aq jaǵańnan alyp, solarǵa sengeniń úshin ózińdi aıypty qylady nemese «netken aqymaq ediń, olar eskertetin bolsa, keshe nege eskertpepti» degen qarsy suraǵyn ortaǵa tastaıdy. Qarsy jaýap qaıyra almaısyń. Almaty-Bishkek tas jolyndaǵy Altyn ordanyń jaıaý júrginshilerge arnalǵan kópiri men Qaskeleńniń kópirine shyǵyp alǵan adamdardy kórip ishińnen myrs etip kúlip te qoıyǵyń keledi. Tótenshe jaǵdaı basqarmasyna qaraǵanda qarapaıym kópirge senim artady eken bizdiń jerlesterimiz. Al sol tas jolda jol kútip, kólik toqtatyp turǵandarda qısap joq. Tipti polısıa qyzmetkerleri Altyn ordadaǵy adamdarǵa tasjolǵa shyǵyp ketpeı, joldan aýlaq turýyn eskertip, olardy ary qaraı ysyryp álek boldy. Joldyń jıegine ysyrylǵan halyq Almatyǵa qatty ókpelep turdy. Tipti saýda-sattyq maqsatymen kelgen kórshilerimiz «Rahmet saǵan, Almaty! Bishkegim tynysh eken » dep qoıady. Feısbýk áleýmettik jelisin paıdalanýshylar da Qazaqstanǵa qonaq sezinetin keıbir jurttyń býynyp-túıinip taıyp turǵanyn jazýda. Rasymen el basyna kún týsa, Almatyny tastaı qashatyndar kóp eken-aý degen oı túıdik.
Abyr men dabyr bastalǵan sátte sabylǵan adamdardy kórip esińe «Tıtanık» fılmi túsip ketedi eken. Onda kemeni qutqarý múmkin bolmaǵanda, halyqtyń úreıin seıiltý úshin mýzykanttar qurban bolmaıtyn ba edi? Úreıli halyq, áı-sháıge qaramaıdy. Sondyqtan olardyń júıkesin tynyshtandyrý qajet. Negizgi maqsat, áıelder men balalardy qutqarý bolatyn. Biraq keýdedegi jandy kim op-ońaı bere salmaq? Barlyǵy aman qalǵysy keledi. Sondyqtan qutqarýshylarǵa kedergi bolmas úshin kemedegi balalar men názik jandylardy aqyryndap qaıyqtarǵa ornalastyratyn edi ǵoı. Al bizde qalaı boldy? Tıtanık sekildi ózimiz baryp alyp muzǵa soqtyqqan joqpyz. Kúndelikti aýasymen tynystap júrgen týǵan qalamyzǵa tilsiz jaý taıady. Qaıda bas saýǵalarymyzdy, aqparattyń ras- ótirigin bilmeı dal boldyq. Bizdiń úreılengenimiz de, qoryqqanymyz da, qysqasy ishki sezimimiz úshin bas qatyryp jatqan eshkim joq. Ábden tań bozaryp atyp, janymyzdy shúberekke túıýdi úırenip qalǵan sátte aspanda ushyp júrgen ákimniń sýretin kórdik. Ákim tikushaqqa minip alypty, demek jerdi shynymen topan sý basatyny ras dep topshyladyq. Bizde ushyp júretin tikushaq joq, sondyqtan kópirge shyǵyp turýdy qanaǵat tuttyq.
Aınur Tóleý
