Ótken túnde Almaty qalasy turǵyndary tosynnan kelgen sel apatynyń saldarynan úıleri men dúnıelerin tastap, qala syrtyna shyǵyp ketkeni týraly aqparattardy qazaqstandyq BAQ jazdy. Osydan keıin-aq, áleýmettik jelilerde seldiń sýretteri men vıdeolary taralyp ketti.
Al Almaty quqyq qorǵaý qyzmetkerleri qazir áleýmettik jelilerge taralǵan barlyq sýretter men vıdeolardy zerttep jatyr,-dep habarlaıdy «Qamshy» portaly Tengrinews.kz-ke silteme jasaı otyryp.
Tipti, jelilerde taralǵan kópshilik jarıalanymnyń jalǵan ekenin Almaty qalalyq İİD baspasóz hatshysy Saltanat Ázirbek hanym da rastap otyr.
Almaty qalalyq İİD-niń sózine súıener bolsaq, Almaty qalasynyń úsh birdeı aýdanyn jalmaǵan tabıǵat apatynyń ornyna áleýmettik jelilerde Reseıdegi seldiń vıdeosyn salyp, jurtty dúrliktirgender de bolǵan eken. Qazirgi tańda İİD ókilderi áleýmettik jelide Almatydaǵy jaǵdaımen baılanystyrǵan adamdy izdestirip jatyr. QR Qylmystyq kodeksinde kórsetilgendeı, jalǵan aqparatty taratqandarǵa 5000 AEK kóleminde aıyppul nemese 2 jyldan 5 jylǵa deıin bas bostandyǵynan shekteý nemese aıyrý jazasy qarastyrylǵan.
Eske sala keteıik, Naýryzbaı aýdanyndaǵy Qarǵaly ózen sýynyń deńgeıiniń kóterilgendigi jaıly habar túngi saǵat 03.00-de tústi.
Qazir, oqıǵa ornyna QR Premer-mınıstriniń birinshi orynbasary Berdibek Saparbaev myrza men QR İİM orynbasary Vladımır Bojko kelgen.
«Qazselqorǵaýdyń» aqparatyna súıensek, plotına jarylmaǵan, al qalany basyp qalǵan sýdy shlúz arqyly aǵyzyp jebirý jumystary júrgizilýde. Al apatty aımaqtan 900-den astam adam qaýipsiz oryndarǵa jetkizilgen.
Eskere ketetin taǵy bir jaıt, halyqqa Almaty qalasynda túńgi saǵat 03:00 shamasynda bastalǵan sel týraly aqparatty quzyrly organdardyń eshbiri bermegen. Qazaqstannyń qanshama oblystaryn sý shaıyp, sel basyp jatsa da bylq etpeıtin TJK basshysy Bojko myrza bul joly da únsiz. Óziniń oryntaǵyna myqtap jaıǵasqan Bojkonyń Almatydaǵy apattan keıin mınkabıneti saqtala ma? Bıylǵy jyldyń ózinde, Qazaqstannyń 5 oblysyn sý shaıyp ketkende Bojko myrza ne istedi? Almatydaǵy sel apatynan keıin Bojko myrza ne isteıdi? Ánsheıinde, telefonǵa tynym bermeıtin TJK SMS-lary sel tasqyny týraly nege únsiz qaldy?
Aıtpaqshy, osynyń aldynda qala ákimi Ahmetjan Esimovtyń áleýmettik jelilerdegi «Vertoletpen» apatty aımaqtardy aralap júrgeni týraly aqparat taraǵan bolatyn. Biraq, munyń ózi naqty dáleldenbegen. Iaǵnı, shynymen de ákim myrza apatty aımaqtardy aralap júr me?
Nurzat Toǵjan
