Jambyl oblysy ákimdiginiń densaýlyq saqtaý basqarmasy tıimdi jobalardy qolǵa aldy. Basqarma men №1 Taraz qalalyq aýrýhanasy «OPTONIC» jaýapkershiligi shekteýli seriktestigimen memlekettik jekeshelik áriptestik aıasynda Nıderlandyq Philips kompanıasy shyǵarǵan AZURION 7B20 ıntervensıalyq hırýrgıaǵa arnalǵan angıografıalyq rentgenografıalyq júıeni jetkizý týraly uzaqmerzimdi jobany júzege asyrý maqsatynda úsh jaqty kelisim-shartqa qol qoıdy.

Sondaı-aq, Jambyl oblysy ákimdiginiń densaýlyq saqtaý basqarmasy jáne Shý qalalyq aýrýhanasy «DEMEU» jaýapkershiligi shekteýli seirktestigimen memlekettik jekeshelik áriptestik aıasynda «Kompúterlik tomografpen jabdyqtaý men servıstik qyzmet kórsetý» uzaqmerzimdi jobasyn júzege asyrý maqsatynda kelisim-shartqa qol qoıdy. Endi 4 aı ishinde aýrýdy asqyndyrmaı, onyń aldyn-alýǵa múmkindik beretin, baǵasy qymbat, joǵary sapaly sheteldik zamanaýı kompúterlik tomografıa Shý qalasyna jetkizilip, turǵyndar onyń ıgiligin kóre bastaıdy.

Joǵary sapaly tomograftyń qoldanylýy ınsýlt, tynys organdary aýrýlarynda, qaterli isiktiń paıda bolýynda, qan aınalymy júıesiniń buzylýynda, as qorytý organdary men aǵzanyń basqa da músheleriniń syrqatynda dıagnostıkany erte qoıý úshin asa mańyzdy. Onyń artyqshylyǵy - sanaýly sekýndta on eki músheni tolyqtaı tekserip, ózgeristi birden anyqtap beredi. Emdeý sharalary neǵurlym tez bastalsa, adam tezirek ońalady. Osylaısha, múgedektikke shaldyǵý jaǵdaılary azaıyp, ólim kórsetkishterin tómendetýge múmkindik týatyn bolady. Bizdiń bul jobadan kúterimiz kóp, aldaǵy ýaqytta turǵyndarǵa kórsetiletin medısınalyq kómektiń sapasy men qoljetimdiligin arttyrýdyń birden-bir joly osy bolmaq», – dedi oblystyq densaýlyq saqtaý basqarmasynyń basshysy Marat Jumanqulov.

Atalǵan jobalardyń quny 1 236 862,0 myń teńgeni quraıdy. Onyń ishinde: kompúterlik tomograf – 402 405,0 myń teńge, angıograf – 834 457,0 myń teńge.

Aıta keteıik, angıografıa – qan-tamyrlar men onyń tóńiregindegi ulpalardy rentgen sáýleleri arqyly tekserýdiń jańa ádisi bolyp tabylady. Munyń tıimdiligi orasan. Qozǵalys shektelip, qan tamyrlary tarylyp, onda aqaý kóbeıgen tusta dıagnozdy dóp basýǵa septigin tıgizedi. Arnaıy apparat qantamyrǵa ornalastyrylatyn arnaıy kateter arqyly jumys isteıdi. Ol arqyly pasıentke operasıaǵa deıin jasalǵan barlyq zertteýler, ota kezindegi aǵzadaǵy ózgerister, derttiń qaı jerde, qandaı dárejede ekeni barlyǵy aınadaı kórinip, ońaı basqarylatyn sensor arqyly dárigerdiń baqylaýynda bolady.