Premer-mınıstr Oljas Bektenov qazaqy ıt tuqymyn saqtaý, ósimin molaıtý jáne dáripteý máselelerine qatysty depýtattyq saýalǵa jaýap berdi.
«Janýarlar dúnıesin qorǵaý, ósimin molaıtý jáne paıdalaný týraly» zańdy iske asyrý sheńberinde úkimet tazy men tóbet tuqymyn saqtaý jáne ósimin molaıtý salasynda sharalar qabyldady. Máselen, 2025-2035 jyldarǵa arnalǵan qazaqy ıt tuqymdaryn saqtaý jáne ósimin molaıtý jónindegi jol kartasy bekitildi, ol atalǵan ıt tuqymdaryn qorǵaýǵa, damytýǵa jáne tanymal etýge baǵyttalǵan», - dep málimdedi Oljas Bektenov.
Sondaı-aq premerdiń aıtýynsha, qazaqy ıt tuqymynyń tıisti standarttary qabyldanyp, «Qazaq tazysy» taqyrybyna ǵylymı zertteýler júrgizildi. «Qazaq tóbeti» tuqymy boıynsha osyndaı jumys 2025 jyly aıaqtalady.
«Qazaqy ıt tuqymynyń tazalyǵyn qorǵaýǵa qatysty máseleni qoǵamdyq uıymdarmen jáne memlekettik organdarmen talqylaý qorytyndysy boıynsha qazaqy ıt tuqymdaryn saqtaý jáne ósimin molaıtý máseleleri týraly zań sheńberinde qazaqy ıt tuqymdarynyń ulttyq ortalyǵy qurylǵan», - dedi úkimet basshysy.
Bul ortalyq qazaqtyń taza tuqymdy ıtterin ósirýdi baqylaýdy, ıtterdi synap kórýdi, olardyń kórmelerin, baıqaýlary men jarystaryn uıymdastyrýdy jáne ótkizýdi júzege asyratyn bolady.
Ol sonymen qatar, tazy men tóbet kúni nege 3 qyrkúıekke belgilengenin de túsindirdi.
«Bul másele boıynsha 3 qyrkúıekti osyndaı kún retinde belgileý atalǵan qoǵamdyq uıymdarmen, kınologtarmen jáne tazy men tóbet seleksıonerlerimen talqylanǵanyn habarlaımyz. Bul osy kúni qazaqy ıt tuqymynyń halyqaralyq deńgeıde alǵash tirkelýine, sondaı-aq «qazaq tazysynyń» aldyn ala resmı halyqaralyq deńgeıde tanylýyna baılanysty», - dep jaýap berdi premer-mınıstr.
Sondaı-aq Bektenovtyń málimdeýinshe, belgili jazýshy Muhtar Maǵaýınniń «Tazynyń ólimi» atty áńgimesiniń negizinde kórkem fılm túsirýge daıyndyq jumystary júrip jatyr.
«Muhtar Maǵaýınniń «Tazynyń ólimi» shyǵarmasy negizinde kórkem fılm túsirý máselesi boıynsha qazirgi ýaqytta qolaıly senarılerdi irikteý jumystary júrgizilip jatqanyn atap ótemiz», - dedi premer depýtattyq saýalǵa jaýap bere otyryp.
