Taldyqorǵanda Sherzat Bolattyń ólimine qatysty is boıynsha sot prosesi jalǵasyp jatyr. Sýdıa blogerler men áleýmettik jeli qoldanýshylaryna eskertý jasady.

Sýdıa Erjan Januzaqovtyń sózinshe, prosesti talqylaýǵa, tergeý men sottyń jumysyna baǵa berýge jol berilmeıdi. Bul sotqa qysym retinde baǵalanýy múmkin.

"Áleýmettik jelilerde blogerler men sot prosesine eshqandaı qatysy joq basqa azamattar jeke pikir bildirip, tergeý áreketteri men sot prosesiniń barysyna sýbektıvti baǵa berip jatyr. Qazaqstan Respýblıkasy Konstıtýsıasynyń 75-babynyń 1-tarmaǵyna sáıkes Qazaqstan Respýblıkasynda sot tóreligin tek sot júzege asyratynyn eske salamyz. Sottyń sot tóreligin iske asyrý jónindegi qyzmetine aralasýǵa jol berilmeıdi jáne zań boıynsha jaýapkershilikke ákep soǵady", - dedi sýdıa.

Ol sot prosesi aıaqtalǵanǵa deıin, úkim shyǵarylǵanǵa jáne zańdy kúshine engenge deıin sot prosesine pikir bildirý, quqyqtyq baǵa berý zańsyz ekenin málimdedii.

"Sot istiń barlyq mán-jaıyn jan-jaqty, tolyq tekserýge, aıyptaýshy taraptyń da, qorǵaýshy taraptyń da dálelderin tekserýge mindetti. İsti qaraıtyn sýdıa táýelsiz jáne obektıvti bolýy kerek, prosestiń nátıjesine jeke qyzyǵýshylyǵy bolmaýy kerek jáne úshinshi tulǵalardyń yqpalyna túspeýi kerek. Sot beıtarap tóreshi retinde áreket etedi jáne tek zań negizinde sheshim qabyldaıdy", - dedi ol.