Qasym-Jomart Toqaevtyń tóraǵalyǵymen Qaýipsizdik keńesiniń kólik jáne logıstıka salasyn damytýǵa arnalǵan otyrysy ótti. Jıynda Kólik mınıstri Marat Qarabaev pen birqatar ortalyq memlekettik organdardyń basshylary esep berdi.

Otyrysta Memleket basshysy saladaǵy qazirgi jaǵdaıǵa toqtalyp, kólik ınfraqurylymyn damytýda qordalanǵan máseleler men belgilengen mindetterdiń oryndalmaýyn qatań synǵa aldy. Prezıdenttiń aıtýynsha, bul problemalar jańǵyrtý jumystarynyń tıimdi júrgizilýine eleýli kedergi keltirip otyr.

Qasym-Jomart Toqaev shekaralyq ótkizý beketterindegi jaǵdaıdyń kúrdeli ekenin, júk tasymaly barysynda kóptegen qıyndyqtardyń bar ekenin atap ótti. İri ınfraqurylymdyq jáne tranzıttik jobalardyń ýaqytyly júzege aspaýy da synǵa alyndy. Memleket basshysy "Jasyl dáliz" júıesin jolǵa qoıý jáne elimizdiń logıstıkalyq áleýetin tıimdi paıdalaný qajettigin aıtty. Onyń pikirinshe, jahandyq syn-qaterler údep otyrǵan kezeńde Qazaqstan óz básekelestik artyqshylyqtaryn saqtap qana qoımaı, olardy odan ári nyǵaıtýy tıis.

Sonymen qatar, júk tasymaly kólemin arttyrý úshin ishki naryqty avıaotynmen tolyq qamtamasyz etý, mýltıplıkatıvtik áseri joǵary júk tasymalyn ulǵaıtý jáne Qazaqstannyń álemdik jetkizý tizbegine belsendi qosylýy mindeti qoıyldy.

Jıyn qorytyndysynda Prezıdent Kólik mınıstri Marat Qarabaevqa jiberilgen kemshilikteri úshin sógis jarıalap, saladaǵy problemalardy sheshýge baǵyttalǵan naqty sharalardy qabyldaýdy tapsyrdy.