Jambyl  oblysynyń   80  jyldyǵyna  oraı «Áýender álemi» alańynyń saltanatty   ashylý   rásimi ótti.

Nysan Y.Dúkenuly atyndaǵy Taraz qalalyq Mádenıet úıiniń mańynda ornalasqan. Aýmaǵy 700 sharshy metrden asady. Buǵan deıin qaraýsyz jatqan alań mańyndaǵy aleıa qaıta jańǵyrtylyp,  qalpyna keltirildi.

Aıta keteıik, elimizdiń  atyn  álemge  tanytyp  júrgen mýzyka óneri  qaıratkerleriniń shyǵarmashylyǵyn nasıhattap,  ónegeli   ómir   jolyn  búgingi   urpaqqa  úlgi etý  maqsatynda   ashylǵan  alańnyń ortasyna óner ıeleriniń  qurmetine arnalǵan stella qoıylǵan. Onyń bıiktigi – 6,5 metr. Stelanyń aınalasyna  otyz tuǵyr tas ornatylǵan. Olarǵa qoıylǵan alpys juldyz belgisine elimizdiń  mádenıetine úlken úles qosqan tulǵalar men óner juldyzdarynyń esimderi  jazylǵan.    Stellanyń tuǵyryna J.Jabaev, B.Sholaq, Y.Dúkenuly, K.Ázirbaevtyń óner týraly qanatty sózderi qashalyp jazylǵan.

Nysannyń ashylý saltanatynda Qazaqstannyń jáne Qyrǵyzstannyń Halyq ártisi, Qazaqstan Respýblıkasynyń memlekettik syılyǵynyń laýreaty Altynbek Qorazbaev sóz sóılep, keıingi jyldardaǵy óńirdegi órkendi ister týraly aıta kele, rýhanıat pen mádenıet baǵytynda atqarylyp jatqan júıeli jumystarǵa toqtaldy. Sondaı-aq ol ashylǵaly otyrǵan nysannyń oblystan shyqqan óner adamdaryna degen sheksiz qurmettik belgisi ekendigin marqaıa jetkizdi. Shara barysynda aımaq basshysy Asqar Myrzahmetov  «Áýender álemi» alańyna esimderi  jazylǵan ónerpazdarǵa sertıfıkattar tabystap, óner men ómirde sáttilik tiledi.

Jambyl óńiri elimizdiń óner áleminde qanatyn keńge jaıǵan jaısańdardan kende emes.  Olar tek oblysqa ǵana emes, barsha elimizdiń maqtanyshyna da aınalýda. Qazaq kınoónerindegi aıryqsha tulǵalar Asanáli Áshimov, Tuńǵyshbaı Jamanqulov, án ónerindegi azamattar Ilá Jaqanov, Altynbek Qorazbaev, Mels Ózbekov jáne taǵy basqalardy aıryqsha atap aıtýǵa bolady. Búginde osy tulǵalardyń iziń jalǵap kele jatqan talanttar az emes. Bul alań solardyń ónerine degen qurmet belgisi desek qatelespeımiz.