Ýhannan evakýasıalanǵan stýdentter Nur-Sultandaǵy karantınnen keıin alǵan áserlerimen bólisti. Olardyń aıtýynsha qazirgi tańda qala ishinde adam qorqatyndaı vırýstyń belgileri joq. 

– Bizge Ýhannyń jabylýy týraly aqparat 22 qańtarda keldi. Ózderińiz biletindeı, bul ýaqytta Qytaıda jańa jyl bolatyn. Biz onda birneshe jyl turǵandyqtan, merekege deıin azyq-túlikti aldyn-ala satyp alatynbyz.  Óıtkeni, dúkender jarty kún jumys istep, sodan keıin merekelerge baılanysty jabylady. Keıinnen qalany jabý týraly habarlama kelgenin estidik. Bári kelisilip, josparly túrde jasalǵandyqtan, eshkimde tolqý bolmady. Áleýmettik jelide tarap jatqan aqparattardyń kim jáne qandaı maqsatpen jasalynyp otyrǵanyn bilmeımiz. Biraq, qalada sońǵy nan úshin eshqandaı tóbelestiń bolmaǵany ras, – dep túsindirdi qytaılyq stýdent Gúlbaqyt Bolatbekqyzy.

Onyń aıtýynsha, ýnıversıtettiń aýmaǵy úlken. Iaǵnı stýdentterge barlyq jaǵdaı jasalǵan.

– Demalý, kóńil kóterý oryndary, mysaly teatr nemese kıno t.b. Sondyqtan, karantın jarıalanǵannan keıin kampýsty eshkim tastamady jáne koronavırýstyń aıqyn belgileri bar azamattar kezdespedi. Eger de shekarany ashyp, jaǵdaı rettelip jatsa, keri Qytaıǵa oralyp, aldaǵy josparlarymdy oryndaımyn. Estýimshe, keıbir stýdentterdiń ata-analary oqýdy Qazaqstanǵa aýystyryp, osynda jalǵastyratynyn atap ótti.

Aýrýhanada stýdentterge barlyq jaǵdaı jasalǵan. Atap aıtar bolsam onda bizdi kúnine 4  ret tamaqtandyryp, dárigerlerde jıi kelip tekserip, bizben únemi baılanysta bolyp, qoldaý kórsetti. Sonymen qatar, jaǵdaı jiti baqylaýda bolǵandyqtan 4 kún saıyn tósek-oryn, pıjamalarymyzdy  aýystyryp turdy. Árıne, munyń barlyǵy aldyn-ala uıymdastyrylyp, kelisilgen bolatyn. Bizge barlyq qajettiligimizdi qamtamasyz etken QHR-nyń qyzmetkerlerine alǵysymyzdy bildiremiz, – dedi Gúlbaqyt Bolatbekqyzy.

Ýhannan evakýasıalanǵan stýdent Dáýren Ýrıshanov Qytaıdaǵy indetke baılanysty pikir bildirdi. 

– Internette jiberilgen beınejazbalar eski jáne olar qaladaǵy máselege múldem baılanysty emes. Bizge aldyn-ala eskertý aıtyldy. Iaǵnı, arnaıy dárigerdiń nusqaýlaryn oryndap, maska kıý syndy. Sondyqtan eshqandaı qorqynysh bolmady. Qala syrtyna shyǵýǵa ruqsat bermedi, sol úshin halyqtyń kópshiligi úıde otyryp, jaqyn mańdaǵy dúkenderden azyq-túlik satyp alyp otyrdy, – dedi ol.