AŃSAR

Qaıda,qaıda,
Alańsyz erke kúnder?
Erke kúnder, janymdy órtedińder.
Kúıge toly ómirdiń syryn endi,
Shanaǵymen júrektiń shertemin, kel...

Aqqý ushyp úlgerdi, qazyń qaıtyp,
Al men júrmin mezgilge nazymdy aıtyp.
Saǵynyp kel, ańsap kel turaǵyńdy,
Jáýdir jyrym qalmasyn jazylmaı túk.

Sensiz neni umyttym, neni eskerdim,
Erteńimniń yzǵarly jeli esken myń.
Saǵan barar joldardan ózińdi emes,
Estelikpen juptasqan eles kórdim.

Kóńilime ózińdi kómdim, kóndim,
Qımastyqtyń shyraǵyn sóndirgen muń.
Bir men emes úmitin úzbeı júrgen,
Oralmasyn bilse de sol kúnderdiń..!

ÓMİR

Oılarym joldas bop aldy túndermen kileń,
Taǵatsyz izdep kelemin kún-beıneńdi men.
Kezige qalsaq, júregim nurlansa-daǵy,
Kórsetem jurtqa surlanyp úlgergen reń.

Baqyt ta, baq ta bizderdi tanıdy delik,
Ekeýmiz jaıly aıtpady fánı kúrmelip.
Aýada ushqan asqaqtyq ulpalary da,
Bul kúni meniń janymdy qarıdy kelip.

Ózińnen ózge kimge endi taǵarmyn aıyp,
Salqyndyǵyńnan qalsa eger janar muńaıyp.
Saǵynyshyma tunshyqsam, keter ma eken -
Basymnan baǵym, qolymnan qalamym taıyp.

Qalmaıtyndyǵyn eshqashan kóńil uqtyryp,
Men emes,taǵy men bolyp seni kútti úmit.
Ómir degeniń  -  juldyzǵa tilegińdi aıtý,
Oryndalmasyn bilseń de egilip turyp!

MOIYNDAÝ

Kún kináli,
alystatqan arany.
Tún kináli,
(Ol ózi de jaraly)
Biz ekeýmiz qoshtasqan sát sekildi,
Aı da túnge qolyn bulǵap barady.

Gúl kináli,
ústeldegi solmaǵan.
Nur kináli, 
túnekke kep ornaǵan.
Shattyǵy az, qasireti kóp ómirdi
Saǵynyshsyz súre ala ma sonda adam??!

Jyr kináli,
saǵan áli jazbaǵan.
Syr kináli,
kúzgi alaýdaı mazdaǵan.
Kóktemeden kúlgin kóılek kıip ap,
Mezgilderge nazdanam...

Muń kináli,
kelgen seniń jyr etkiń.
Ún kináli,
daýsyńdy estip dir ettim.
Kim kináli?!
Biz kináli shyǵarmyz -
Sanaspaǵan dúrsilimen júrektiń..!

TAŃǴY SYR

Ómir-oıyn...
taǵy da men utyldym,
Sen ketkeli úıirsek bop búkil muń.
Jastyǵymdy aıyrbastap aldym men
Qanatyna uıqysy joq úkimniń.

Tappaǵasyn daýa bolar emge túk-
Qara túnniń qasiretin teń bólip,
Urttap alyp, óleń jazyp otyrmyn,
Sen bolyp...

Qabaǵyna qaramadym jalǵannyń,
Osy sátte óz-ózime tań qaldym.
Sezim tikken kóńilimniń kestesin,
Sen ketkeli setinetip alǵanmyn.

Jaratqannyń jazýyna kóngen ek,
Taǵdyrymyz bólek deýmen jol bólek.
Tileýińdi tilep júrmin túnderde,
Tań aldynda kúbirlediń sen ne dep ?!

SAÝAL

Kóktemdi kútem degenshe,
Qoı qozdap ketti degeısiń.
Órtenip bitem degenshe,
Oı mazdap ketti degeısiń.

Sýyqtan tońdym degenshe,
Jaýrady janym degeısiń.
Jalǵanǵa sendim degenshe,
Aldady bári degeısiń.

Órtenip bittim degeniń –

Bolmady sener eshkimiń.
Kóktemdi kúttim degeniń –

Kórdiń ǵoı ony keshqurym.

Jalǵanǵa sendim degen ún,
(Sen emes bolsań, kim deımin...)
- Ne deısiń buǵan, Óleńim?!
- Bilmeımin!

SYR

Tamshylardyń tyrsyly - máńgilik án,
Mekendese beımezgil jandy kúmán.
Mamyrdyń shýaǵyna shomyla almaı,
Nur izdegem sáýirdiń jańbyrynan.

Kún uıqyda...Qara bult qaraýyldap,
Shuǵylasy ǵalamnan barady uzap.
Terezemdi yqtaǵan kóbelekke,
Turdym sonda muńdanyp qarap uzaq.

Kóbelegim, kóktemnen neni kúttiń,
Aıaýlyńdy sen de umyt,
Men umyttym!
Jylamashy, bekerge kúrsinbeıik,
Bizge búgin aqtalsyn egilip Tún.

Gúlsiz bilem ómirdi súre alasyń,
(Muńsyz meniń belgili shydamasym...)
Jaralanǵysh janyńnan bezer bolsań,
Náziktigi júrektiń kúná ma shyn?!

Dertimiz bar kónbeıtin emge múldem,
Dúr silkindi búgin de Jer demimnen.
Tań atsynshy, usha ǵoı,
Gúlińe bar,
Halin onyń suraımyn men de Kúnnen...

JALǴYZDYQ

Eshkim joq myna sary qyzdy uǵar,
Muń menen jyry bolmasa.
Árkimniń jalǵyz jalǵyzdyǵy bar,
Janashyr emes ol da asa.

Armanǵa aldanyp kóz ildim taǵy,
Atar tańym da araısyz.
Erte gúldegen sezimniń bári:
Baıansyz, baqsyz, talaısyz.

Súımeýge múlde bekiný degen,
Ońaı-aq sharýa! (Essizdik...)
Ómir óterin ókinýmenen,
Ókinishtisi - kesh bildik.

Keshiktik, keshtik júrektiń isin, 
Tiken bop janǵa qadalǵan.
Keýdemde óksik dir etti, túsin,
Án salaıynshy, ýa, jalǵan!

ELEGIA EMES

Joldas qaıda jubymyz máńgi degen,
Bile almadym kóńilim qaldy neden?
Jazmyshymdy janarǵa kóshirip ap,
Jyldar ketip barady jáýdiregen.

Mendik ǵumyr bolyp júr jurtqa "qaıǵy",
Qushaǵynan bulttardyń shyqqan Aımyn!
Áke, seniń eseıgen erke qyzyń,
On segizge ózin esh juptamaıdy.

Qol bulǵady ótkenge kúlip búgin,
Bolashaǵy syılady úmit gúlin.
Alaqanyn óleńge jaıǵan sátte,
Ákesi Han ekenin umytty myń.

Taýǵa qarap ór bolyp óskesin bek,
Alasasyn adamnyń tek keshirmek.
"Táńirtaýym - bir tóbe",- deıdi aqtalyp,
Qarataý men Alataý sókpesin dep.

Janyn jıi jaralap myqtysy keı,
Ómir ne ol?!
(ketse she, tipti súrmeı)
Eshkimniń eshteńesin almaǵan ed,
Balapanyń taǵy otyr túk túsinbeı...
Áke!

MAÝSYMDAǴY JYR

Samalyn án qyp kóktemniń,
Jaz keldi..
Áli joq belgiń.
"Maýsym. Kesh. Seniń shaharyń",
Mazalaı berdi-aý ótken kún.

Oralmas shaqtar elestep, 
(Bir bolamyz ba egessek?) 
Jańbyr astynda turyp ek,
Qolshatyr qajet emes dep...

Kóz jasy joldas- muńdardyń,
Bar ma eken,sirá,qurǵar kún?!
Sen bergen sertti sezimniń,
Sıqyrynan men nurlandym.

Ózińsiz jyrǵa jaq ashpan,
Basyma tóndi qara aspan.
Jalǵyzdyq jalǵyz tiregim, 
Jaratýshyǵa jarasqan!

Jazdyń da,kúzdiń,kóktemniń,
Salqynyn sensiz ótkerdim.
Jetisi búgin maýsymnyń,
Jyl ótti,
Júdeý júrekti
jylatty taǵy ótken kún..

Álıa İŃKÁRBEK