Mınıstrlikten 11 mlrd teńge bólingen "Qasym han" týraly kórkem fılmniń túsirý jumystary toqtap tur. Buny bastapqy senarı avtory Smaǵul Elýbaı rastady, dep habarlaıdy Qamshy.kz aqparat agenttigi Azattyq Rýhy deregin negizge alyp.

Onda jazýshy áýeli atalǵan fılm taǵdyrynyń qalaı sheshilgenin aıtyp bergen: 

«Fılm toqtatyldy, konservasıada tur. Qarjylyq máseleleri tekserilip jatyr. Ary qaraı ne bolatynyn bilmeımin. Osy daýdan soń mınıstrmen kezdesý boldy. Biraq ol odan da joǵary deńgeıde sheshildi ǵoı. Ol úlken kisilerge aıtyp kóreıin dedi. Aıtyldy. Sosyn toqtatyldy. Fılm halyqqa kerek. Men bir jyldaı jumys istegen senarı tur, daıyn. Biraq joba múldem jabylǵan joq. Ýaqytsha toqtatylyp tur. Meniń oıymsha, bári durys sheshiledi. Sebebi qarjysy bólingen, jabylmaýy kerek dep oılaımyn. Konservasıadan alynýyn kútip otyrmyz», - deıdi Smaǵul Elýbaı.

Qalamger budan bólek Mınıstrlik ókilderi bul máselege qatysty aldaǵy kúnderi jaýap beretinin de jetkizedi. Sonymen birge, tájirıbeli túrik rejıseriniń kópserıaly kıno túsirýine nege qarsy bolǵanyn ashyp túsindiredi.

«Gúnaı joba toqtatylǵan soń ketip qaldy. Men onymen bir-aq ret, eń alǵash kelgen kezde kezdesip, talqylaýda  birge bolǵanbyz. Biraq keıin biz onyń kóp serıa túsirýine qarsy boldyq qoı. Onyń sebebi 30-40 jyl Qasym han men Muhamed Shaıbanı qazaq-ózbek bolyp soǵysady. Men jazǵan senarıde bul jaǵy jasyryn kórsetilgen edi. Endi álgi serıalda ony jasyra almaıtyny belgili. Ekrandaǵy tóbeles ómirdegi tóbeleske ulasyp ketýi múmkin. Toqatý kerek dep qarsy bolǵanym sondyqtan. Aralasyp otyrǵan dos halyqpen soǵysty nasıhattaýǵa bolmaıdy. Eger bir serıasyn túsirsek, bir-aq ret soǵys kórsetiledi. Negizgi aksent Muhamed Shaıbanıdiń ózi men Qasym hanǵa jasalady. Qalǵan jerinde sylap-sıpap ótip ketemiz. Onyń aqyrynda ózbekter jeńilip ketti, Syǵanaqty tastap, olar Buqara, Samarqanǵa aýyp ketti», - deıdi jazýshy.

Eń qyzyǵy, Smaǵul Elýbaı bir serıaly prokatqa arnalǵan «Qasym han» týyndysyna Mınıstrlik bólgen qarjydan az aqsha ketedi dep esepteıdi. Onyń aıtýynsha, ózi usynǵan jobaǵa 2 mln AQSH dollary kóleminde qarajat jetkilikti. 

Eske sala keteıik, Smaǵul  Elýbaı «Batyr Baıan» (1992), «Kek» (2004), «Ańshy bala» (2012), «Almas qylysh» (2016), «Qazaq handyǵy» teleserıaly (2016), «Altyn taq» (2019) sıaqty birneshe týyndy senarıleriniń avtory.