Iá, prezıdent sol kezdesýde tup-týra dúńgenderge: "Sizderdiń balalaryńyz qazaq tilin úırenýi kerek" dep eskertti. Muny ol Qordaı oqıǵasy buryn-sońdy bolmaǵan jaǵdaı ekenin, tipti bunda bıliktiń de qateligi bar ekenin ataı otyryp málimdedi.
Ol – ol ma, Toqaev osy kezdesýinde dúngen dıasporasynyń ókilderine jastardyń tárbıesine basa mán berýi kerektigin de basa aıtty.
"Sizderdiń balalaryńyz qazaq tilin úırenýi kerek. Sondaı-aq orys tili men óziniń ana tilin de bilýi qajet. Memleket sizderdiń mádenıetterińiz ben dástúrlerińizdi saqtap, damytýǵa jan-jaqty qoldaý kórsetedi. Degenmen sizder, ásirese, aýylda turatyn azamattar memlekettik tildi bilgenderińiz asa mańyzdy", – dedi Toqaev.
Sóıtip, soqqydan súıretilip júrip mıtıńige shyǵatyn "jaraly" qazaq ultshyldarynyń sál de bolsa qabaǵyn jazǵysy kelgendeı. Óıtpese, Toqaevtyń "toı" tarqaǵanda toptanyp Sartóbege barýy, osyǵan deıin BAQ beti "janyp" turǵanda aıtpaǵan pikirdi aýyldaǵy az halyqqa ǵana aıtý úshin barýy múmkin deısiz be?..
Eń qyzyǵy sol, Kemeluly úkimet otyrystarynyń birindegi B. Saparbaevtyń turǵyndardy basqa jaqqa kóshiriý týraly: "Meniń oıymsha, bul suraqty kóterý erte. Buǵan deıin qalaı turyp kelse, solaı turý kerek. Eń bastysy kelisim men ózara túsinistik bolýy tıis" degen sózin de sál "kásibılendirdi".
Dálirek aıtqanda, Berdibek aıtqan "buǵan deıin qalaı turyp kelse, solaı turý" degen nemkettileý pikirdi Memleket basshysynyń tómendegi emeýrini eptep túzedi deýge negiz bar. Ony da oqyp kórińiz:
"Qazaqstan – baıtaq ári baı memleket. Elimizdiń soltústiginde qunarly jerler bar. Biz nege bir jerde ǵana turaqtaýymyz kerek? Balalaryńyzdy soltústikke, shyǵysqa qaraı jiberińizder. Soltústik, batys, ońtústik, shyǵysta sizderdiń balalaryńyzǵa jumys istep, aqsha tabýǵa múmkindik mol", – dedi Qasym-Jomart Toqaev.
"Múmkindik" demekshi, Qazaqstan Prezıdenti Qarakemer, Masanshy jáne Sortóbe aýyldaryndaǵy Arnaıy jedel áreket etý jasaǵynyń múmkindigin de tekserip qaıtty osy saparynda. Tipti, Ulttyq gvardıanyń áskerı qyzmetshilerimen de áńgimelesken. Bul da Qordaı qaýpindegi "sezimtal" tus.
Bir sózben aıtqanda, Almaty mıtıńiden "kóz ashpaı" turǵan kilteń tusta Toqaev Qordaıdaǵy "qolamtanyń" ystyǵyn ózi baryp qopsytyp-qopsytyp tekserdi. Sóıtti de dıplomat "jińishke" saıasattyń "jibin" qaldyrdy sonda.
Sebebi, Prezıdenttiń Qordaıǵa sapary mıtıńlerdi "kómeskilendirý" nemese "qara qazannyń býyn shyǵarý" degenimizben, joǵarydaǵy mysaldar-aq qazaq-dúńgen qatynasynyń da únemi "jórmep" otyrylýy tıis jubyna jetken másele ekenin aıǵaqtasa kerek.
Pikir qaldyrý