"Úıde otyryp ábden zeriktik". Almatydaǵy indet oshaqtaryndaǵy jaǵdaı

/image/2020/03/21/crop-128_96_768x1024_140641595400.jpeg

Almaty qalasyndaǵy epıdemıologıalyq tekserý nátıjeleri boıynsha COVID-2019-dyń 10 oshaǵy anyqtalǵan. Vırýs juqtyrǵan turǵyndar arnaıy oryndarda karantınde jatyr. Olarmen baılanysqan adamdarǵa vırýs juqpaýy úshin naýqastar turatyn úıler indet oshaǵy retinde belgilenip, 14 kúnge karantınge jabylǵan. Qamshy tilshisi solardyń birqataryndaǵy jaǵdaımen tanysyp qaıtty.

Almaly aýdanyndaǵy indet oshaqtarynyń biri – Jarokov 16 mekenjaıy boıynsha ornalasqan kópqabatty úı.

İndet oshaǵy anyqtalǵan úı kireberisi tolyq oqshaýlanǵan. Eshkimge kirip-shyǵýǵa ruhsat joq. Kireberiske birneshe temir qorshaý men "Nazar aýdaryńyz! Qaýipti aımaq" dep jazylǵan plakat qoıylǵan. Onyń syrtynda polısıa qyzmetkerleri tur.

Jarokov kóshesindegi 16 úıdiń karantınge jabylǵan kireberisi

Jarokov kóshesi 16 úıdegi karantınge jabylǵan kireberisti kúzetip turǵan polısıa qyzmetkerleri

Karantın barysyn qadaǵalap júrgen Almaly aýdanynyń ákimi Bekqalı Torǵaev úı karantınine jabylǵan turǵyndarǵa barlyq kerek-jaraq ýaqytyly jetkizilip otyrǵanyn aıtty.

– Birneshe kireberisten turatyn úıdiń indet oshaǵy tabylǵan kireberisi ǵana karantın jabylǵan. Qolda bar derekke saı, koronavırýs anyqtalǵan turǵyn shetelden kelgen. Azamat týraly ózge aqparatpen bólise almaımyz. Úıdiń ózge turǵyndary 14 kún karantın jaǵdaıynda baqylaýda bolady. №3 emhana mamandary 10:00-ge deıin bir ret, 20:00-ge deıin bir ret kúnine 2 márte úı turǵyndaryn tekserip turady. Kerek zattardy syrttan ákelip berip jatyrmyz. Turǵyndarǵa jaýapty tulǵalardyń nomerleri berilgen. Jaǵdaı tolyq baqylaýda. Qala turǵyndarynan úıinen shyqpaı, tek resmı aqparǵa senýge shaqyramyz, – deıdi Bekqalı Torǵaev.

Jaýapty tulǵalar nomeri jazylǵan plakat

İndet anyqtalǵan azamattardyń biri – Zenkov kóshesi 59 úıdegi Suńqar turǵyn-úı kesheninde turady.

Munda da karantın tártipke saı júzege asyrylyp jatyr. Polısıa qyzmetkerleri eshkimniń úıden shyqpaýyn, úıge kirmeýin táýlik boıy qadaǵalap tur. Kezekshilikte turǵan polısıa qyzmetkeri turǵyndar ótinishi boıynsha dúkenge baryp, kerek-jaraqtaryn alyp berip júrgenin aıtty.

Suńqar turǵyn-úı kesheniniń karantınge jabylǵan kireberisi

Suńqar turǵyn-úı kesheniniń turǵyndaryna tamaq ákelip turǵan jetkizýshi

Turǵyndarǵa esik aldyna shyǵyp, shylym shegip, taza aýamen tynystaýyna ruhsat etilgen. Jaǵdaılaryn suraǵan Qamshy tilshisine turǵyndardyń biri "úıde otyryp ábden zeriktik. Biraq amal ne, kónemiz" dep jaýap berdi.

Gogol kóshesindegi 75-úıdegi jaǵdaı da osyǵan uqsas.

Gogol kóshesindegi 75-úı aýlasy

Turǵyndarǵa qorshalǵan temir qorshaýlardan shyǵýǵa bolmaıdy. Ony kezekshi polısıa qyzmetkerleri men medbıkeler qadaǵalap tur. Turǵyndar qajet zattardy polısıa qyzmetkerleri men tanystaryna aldyryp jatyr.