Qala kóshelerinde kólik pen adam sany azaıǵanymen, tazalyq jumystary men dezınfeksıalaý qarqyndy júrip jatyr. Bul týraly almaty.tv habarlady. 

Oǵan komýnaldyq qyzmet kórsetetin mamandardy qosqanda 1500 adam, sondaı-aq, 300-ge jýyq arnaıy tehnıka jumyldyrylǵan. Shahardyń ár aýdanynda 70 brıgada dezınfeksıa sharalaryn júzege asyrýda.

Almatyda 8 myń 500 turǵyn úı, 23 myń kireberis pen 4 myńnan astam aýla bar. Óńdeý jumystary aptasyna eki márte júrgiziledi. Kúnine shahardyń 33 paıyzy qamtylady. Jaýapty mamandardyń aıtýynsha, dezınfeksıa jumystarynyń kestesi turǵyndarǵa aldyn-ala habarlanyp jatyr.      

– Búgingi kúni olar veb-saıttarǵa jáne aýdandyq ákimdikterdiń áleýmettik jelilerdegi resmı paraqshalarynda qoljetimdi. Sonymen birge, kireberister men aqparattyq stendterde ornalasqan. Barlyq tartylǵan merdiger uıymdar tıisti biliktilikke, eńbek resýrstaryna jáne materıaldyq jabdyqtarǵa ıe. Oryndalǵan jumystarǵa turǵyn úı ınspeksıasynyń ókilderiniń jáne aýdan ákimdikteriniń baqylaýymen basqarý organdary, ıaǵnı páter ıeleri kooperatıvi ókilderi nemese úı boıynsha úlkenderdi  qabyldaıdy, – dedi qalalyq Turǵyn úı saıasaty basqarmasy basshysynyń orynbasary Meıirjan OTYNSHIEV.

Buryn habarlanǵandaı, qala ákimdigi turǵyndardy qoldaý boıynsha birqatar sharalar qabyldady. Atap ótsek,  sýmen jabdyqtaý jáne sý tartý qyzmetterine, jylý jáne ystyq sýmen jabdyqtaý, elektr energıasy, gaz jáne telefon baılanysyna tólem jasaýǵa eshkim májbúrlemeıdi. Bul bastamany lıft uıymdary da qoldady. Turǵyn úı saıasaty basqarmasynyń ókili osy jóninde de aıtyp ótti.

– Olar qala turǵyndaryna aıyppul sanksıalaryn qoldanbaı, eki aıǵa (naýryz, sáýir) tólemdi keıinge qaldyrdy. Osyǵan baılanysty, búginde turǵyndar tarapynan komýnaldyq tólemderdi keıinge qaldyrý, jóndeý jáne qyzmet kórsetý aqylaryna da qatysty ma degen suraqtar jıi qoıylady. Turǵyn úı saıasaty basqarmasy tarapynan aı saıynǵy jarnalar bolmaǵan kezde, basqarý organdarynyń qyzmetin qamtamasyz etý múmkin emestigin túsindiremiz, – dedi qalalyq Turǵyn úı saıasaty basqarmasy basshysynyń orynbasary Meıirjan OTYNSHIEV

Qala bıligi tek Almaty ishin ǵana emes, irgeles jatqan Almaty oblysynyń adam kóp jınalatyn oryndaryna da turaqty zalalsyzdandyrý jumystaryn júrgizip otyr. Mysaly, Qorǵanys mınıstrligine qarasty radıasıalyq jáne hımıalyq qorǵaý qyzmetiniń mamandary «Altyn Orda» bazarynda turaqty túrde  aýqymdy dezınfeksıa júrgizedi.

– Búgingi kúnde Almaty qalasynda karantın jarıalanýyna baılanysty QR Qarýly kúshterinde tehnıkalar men arnaıy jabdyqtalǵan quraldary qaladaǵy ǵımarattar men kóshelerge jumyldyrýda. Qalamyzda arnaıy óńdeý jumystary júrgizilip jatyr. Qurmetti qala turǵyndary, sizderden ótinerimiz qalaǵa kóp shyqpaýlaryńyzdy suranamyz!, – dedi Almaty qalasyndaǵy Áskerı ınjenerlik ınstıtýtynyń radıasıalyq jáne hımıalyq qorǵaý qyzmetiniń basshysy Baqytjan TEMİRBAEV.

Dezınfeksıalyq preparattardyń quramyna keler bolsaq, kire berister men kóshelerdi zalalsyzdandyrý úshin alma ekstra, sanlaıt, septolıt jáne konsept suıyqtyqtary shashylsa, kósheler men kire beristerge natrıı gıpohlorıti, al kólik pen aıaldamalalarǵa dezıtabs qoldanydaldy.

Qoǵamdyq kólikter ár reıs saıyn sońǵy aıaldamada tazalanyp jatyr. Vırýsqa qarsy kúreske jaýapty qala mamandary kún saıyn 8 myń kireberis pen myńǵa jýyq aýlany dezınfeksıalaýǵa qaýqarly. Ol úshin 1500 adam men 140 tazalýshy kólik tartylǵan. Al, Almaty kóshelerindegi  sanıtarlyq jáne dezınfeksıalyq jumystar úshin 120 maman, 146 sý shashqysh arnaıy tehnıka men 854 jumysshy qyzmet etip jatyr.