Qazaqstan halqy Assambleıasy Túrkistan oblysy Maqtaaral aýdanynda sý tasqynynan zardap shekken turǵyndarǵa 16 júk kóligimen 180 tonna gýmanıtarlyq kómek jiberdi, dep QazAqparat habarlady. 

Gýmanıtarlyq kómekti Almaty ózbek etnomádenı birlestigi, Qazaqstan uıǵyrlarynyń respýblıkalyq etnomádenı birlestiginiń fılıaly, Almaty qalalyq uıǵyr etnomádenı birlestigi, Dúngen qoǵamynyń Almatydaǵy fılıaly, sondaı-aq «Ahyska» túrik etnomádenı birlestigi jáne basqa da ortalyqtar uıymdastyrdy.

Jasaqtalǵan kerýen jolǵa shyǵar aldynda Qazaqstan halqy Assambleıasy tóraǵasynyń orynbasary Janseıit Túımebaev aqjol tilep, qaıyrymdylyq kómekke atsalysqan etnos ókilderine alǵys bildirdi.

– Shymkent qalasyndaǵy Dostyq úıiniń bazasynda respýblıkalyq Assambleıanyń kómek kórsetý shtaby jumys isteıdi. Elimizdiń barlyq óńirleri Assambleıanyń úndeýine qulaq asyp, ekonomıkalyq qıyndyqtar men karantınge qaramastan, barynsha kómek kórsetýde. «Jańǵyrý joly» respýblıkalyq jastar qozǵalysy, Assambleıanyń volonterler qozǵalysynyń ortalyqtary, QHA-nyń basqa qurylymdyq bólimsheleri jáne belsendiler qosyldy. Men osy qaıyrymdylyq aksıasynyń barlyq qatysýshylaryna alǵys aıtamyn, – dedi Janseıit Túımebaev.

Aıta ketý kerek, QHA Túrkistan oblysyna gýmanıtarlyq kómektiń ekinshi partıasyn jiberdi. Birinshi kezeń aıasynda 23 mln 325 myń teńgege gýmanıtarlyq kómek kórsetildi.