Brıtanıalyq saıasatker AQSH pen Qytaı nege Úshinshi dúnıejúzilik soǵys bastaý qaýpinde turǵanyn túsindirdi.
Onyń aıtýynsha, Birinshi dúnıejúzilik soǵystyń aldyndaǵy jaǵdaılar 2020 jyly qaıtalanýda. Bul týraly Qamshy tilshisi Daily Express basylymyna silteme jasap habarlady. 

Ulybrıtanıalyq saıasatker Djordj Gelloýeı AQSH pen Qytaı arasyndaǵy qaqtyǵys bıylǵy jyly jahandyq soǵysqa ulasýy múmkindigin boljaıdy. Djordj Gelloýeı Birinshi dúnıejúzilik soǵystyń bastalýy men qazirgi shıelenister arasyndaǵy shynaıy uqsastyqtardy atap ótti.

Brıtanıanyń eks-depýtaty AQSH-Qytaı saýda-sattyq kelisimshartynyń birinshi kezeńiniń buzylý qaýpine nazar aýdardy. Onyń aıtýynsha, AQSH Beıjińdi koronavırýs taratqany úshin «jazalaýdyń» joldaryn izdeıdi. 

Gelloýeı Birinshi dúnıejúzilik soǵystyń bastalýy dál osyndaı saýda kelisimderiniń buzylýy jáne saýda soǵysy saldarynan bolǵanyn aıtty. Ekonomıkalyq apat ákeletin saıasattar jahandyq soǵys otyn tutandyratynyn eskertti.

Brıtanıalyq saıasatker AQSH prezıdentiniń Qytaıdy ekonomıkalyq jazalaý týraly eskertpesin egjeı-tegjeıli túsindirdi jáne Tramptyń jańa tarıfter engizip, Beıjińdi jazalamaq bolǵanyn da tilge tıek etti.

"Qytaıdan bastap taralǵan koronavırýs AQSH-taǵy myńdaǵan adamnyń ólimine ákep soqtyrdy" dep Beıjińdi aıyptaǵan Tramp "AQSH-Qytaı saýda kelisiminiń birinshi satysy" dep atalatyn saýda mámilesin aıaqtaıtynyn jarıalaǵan. 

AQSH prezıdenti Qytaı alǵashqy saýda kelisiminde kelisilgen satyp alý boıynsha mindettemelerin oryndamasa, saýda mámilesin joıatynyn aıtqan.

Aıta keteıik, Djordj Gelloýeı birneshe apta buryn The New York Post gazetine Úshinshi dúnıejúzilik soǵysty kimder bastaıtyny týraly suhbat bergen bolatyn.