Demalys kúnderi memleket basshysynyń jarlyǵymen bılikte biraz aýys-túıister kórinis berdi, soǵan oraı Ahmetjan Esimov Almaty qalasynyń ákimi qyzmetinen bosap, «Astana –EKSPO 2017» Ulttyq kompanıasy basqarmasynyń tóraǵasy bolyp taǵaıyndaldy.
7 jyl boıy Almaty qalasyn basqarǵan Esimovtiń qala ákimi retinde atqarǵan mindeti men ótimdi, ónimdi, halyq úshin jasaǵan qyzymetterin nazarlaryńyzǵa usyna keteıik:
Esimov ákim bolǵan sol jyldar Almatyda 400 myńǵa jýyq adam baspana alyp, 16 myń san soqqan úleskerlerdiń máselesi sheshildi. 2008 jyldan beri qaraı 117 bilim berý, 42 densaýlyq saqtaý nysany ashylǵan.
Orta eseppen kúnine 35-37 myń jolaýshy tasıtyn metropolıten qurylysy aıaqtalyp, iske qosyldy.
2008 jylǵa deıin tolyǵymen jeke menshikte bolǵan qalalyq mýnısıpaldyq qoǵamdyq kólik qatynasy retke keltirildi. Búginde qalada gazben júretin 600 avtobýs pen 400 taksı, 232 troleıbýs pen tramvaı, sonymen qatar, metro bar. Qala menshigindegi qoǵamdyq kólikterdiń barlyǵy ekologıalyq taza bolyp tabylady. Bul týraly "nur.kz" saıty jazǵan.
2011 jyly aqpan men naýryz aralyǵynda Almaty men Astana arasynda sary qurlyqtyń 26 memleketi qatysqan qysqy Azıa oıyndary ótti.
2011 jyldan bastap Ahmetjan Esimovtiń bastamasymen Almatydaǵy «baraholka» bazary súrile bastady. Zertteýler nátıjesinde 34 bazar ruqsatsyz jerde salynǵan. Búginde atalǵan bazarlar súrilip tastaldy, ornyna jańa saýda ortalyqtary boı kóterdi.
Almatyda znergojabdyqtaý isi qalypqa keltirilip energetıkalyq nysandar men 31 jańa podstansıa ashyldy.
Keńes zamanynan beri tuńǵysh ret qalada eń iri mádenı oshaq – «Alataý» kınokonsert zaly ashyldy. Shańǵymen sekirýden halyqaralyq «Suńqar» kesheni iske qosyldy. Almaty qalasynyń turǵyndary taýǵa shańǵymen syrǵanap, velosıpedpen serýen qurýǵa, gólf oınaýǵa qolaıly jaǵdaılar týdy. Almatydaǵy sport arenalary jóndeýden ótip, 7 jyl ishinde Rıts Karlton», «Rıksos», «Roıal Týlıp» meıramhanalary, «Esentaı Moll», «Dostyq plaza», «Mega» saýda ortalyqtary boı kóterdi.
Búginde Almatyda 28 jol aıryǵy bar. 91 jer ústi jáne jer asty ótkelderi salyndy. 140 shaqyrym jańa jol salynyp, 1265 shaqyrym jol jóndeýden ótken.
2015 jyldyń sáýir aıynda Esimovtiń bastamasymen Almatyda Rysqulov dańǵyly men Saıyn kóshesiniń qılysynda salynyp jatqan jolaıryqtyń qurylys jumystary kezinde temir qursaýlary qulady. Qalalyq Tótenshe jaǵdaılar departamenti mamandarynyń aıtýynsha, qurylys basynda 52 adam jumys istegen. Olardyń 21-i zardap shekti.
2015 jyly sáýirdiń 27-si Almatydaǵy iri saýda ortalyǵynyń biri "Adem" saýda keshenin órt shaldy.
Esterińizge salyp ótsek, 23 shildege qaraǵan túni Almaty qalasynyń Naýryzbaı aýdanynda sel júrdi. Almaty turǵyndarynyń úıin sý alyp, laı-batpaq astynda qaldy.
Saıran ózeniniń jaǵalaýy kúrdeli jóndeýden ótip, 120 myń aǵash otyrǵyzyldy.
Halyqaralyq Olımpıada komıteti 2022 jylǵy olımpıada oıyndaryn Qytaıdyń Beıjiń qalasynda ótetinin jón dep tapty. Olımpıada oıyndarynyń Almaty qalasynda ótkizý jóninde usynys barysynda Almatynyń eski ákimi Esimov óz aǵylshynshasymen este qaldy.
Endigi jerde, úlken megapolıske aınalǵan Almaty qalasynyń sýdaı jańa ákimi bolyp Elbasymyzdyń synyptasynyń uly Baýyrjan Baıbek taǵaıyndaldy. Jas mamanmen birge Almaty qaıta jańarý men jańǵyrýǵa, tyń, jas ıdealardyń bastamasymen bolashaqta baıandy qalaǵa aınalatyny daýsyz. Baýyrjan Baıbekke buıyrǵan alyp qalanyń tizgini týraly áleýmettik jeli paıdalanýshylar óz yqylastaryn bildirýde. Ákim retinde endi tizgin ustaǵan azamat týraly boljam aıtý qıyn, alaıda Raıymbek babanyń túıesi shókken shahar-elimizdiń kúretamyryna aınalyp úlgergen. Kúretamyrdy tap basyp, ondaǵy ahýaldy aınytpaı aıta alatyn adam kelgenine sengimiz keledi.
Gúlden ÁBDİBAQYT
