Almaty qalalyq Qoǵamdyq densaýlyq saqtaý basqarmasynyń basshysy Kamaljan Nadyrov qalada jedel járdem qyzmetine qońyraý shalý sany eki ese artqanyn aıtty.

«Epıdemıa bastalǵannan beri qalada jalpy 3 530 jaǵdaı tirkeldi. 2 178 adam saýyǵyp, emdelip shyqty. Qaıtys bolǵandar sany - 23. Búginde qala stasıonarlarynda 1 398 naýqas em alyp jatyr. Aýyrlyq dárejesi boıynsha óte aýyr hálde 19 adam, aýyr dárejede - 173, ortasha dárejede - 1044 jáne qanaǵattanarlyq jaǵdaıda 162 adam tirkelip otyr», - dedi K. Nadyrov Ortalyq komýnıkasıalar qyzmetindegi onlaın baspasóz qyzmetinde.

Osy oraıda ol qala boıynsha stasıonarlar men alǵashqy sanıtarlyq-medısınalyq kómek kórsetý uıymdarynda medısınalyq kómekti uıymdastyrý jumystary tolyqqandy júrgizilip jatqanyn jetkizdi.

«Tek ótken aptada aýrýhanalarǵa jatqyzý men jedel járdem qyzmetine qońyraý shalý sany eki ese artqan bolatyn. Naýqastar sanynyń ósýi sebebin qant dıabeti, júrek aýrýlary arterıaldy gıpertenzıa sıaqty aýrýlary bar pasıentterdiń kóbeıýimen baılanysty degen qorytyndyǵa kelip otyrmyz. Sondaı-aq, aýrýdyń aýyrlyǵy men pasıentterdiń jas arasyndaǵy baılanys anyq baıqalady, ıaǵnı jaı-kúıi aýyr jáne óte aýyr pasıentter arasynda 80 paıyzdan astamyn 60 jastan asqan adamdar quraıdy», - dedi basqarma basshysy.

Taldaý nátıjeleri boıynsha 20-29 jas aralyǵyndaǵy adamdar jıi juqtyratynyn kórsetip otyr, olarǵa aýrýǵa shaldyǵý jaǵdaılarynyń 35 paıyzy tıesili. Al 60 jastan asqan adamdar arasynda ınfeksıa juqtyrý kórsetkishi 8,8 paıyz deńgeıinde.

Onyń sózine qaraǵanda, jalpy dınamıkada derttiń aýyr jáne óte aýyr dárejede ótip jatqan naýqastardyń kóbeıýi baıqalady.