QR Prezıdentiniń keńesshisi Erlan Qarın elde balalarǵa zorlyq-zombylyq jasaǵandarǵa qarastyrylǵan qatań jazanyń bar ekenin aıtty. Bul týraly ol Telegram paraqshasynda jazdy.

"Sońǵy oqıǵalarǵa baılanysty jeli paıdalanýshylary balalarǵa jasalǵan zorlyq-zombylyqqa jazany kúsheıtý kerek dep jazyp júr. Shyn máninde mundaı sharalar Memleket basshysynyń bastamasymen ótken jyly qabyldanǵan edi. Prezıdent 2019 jyldyń 2 qyrkúıeginde Qazaqstan halqyna arnalǵan alǵashqy Joldaýynda seksýaldyq zorlyq-zombylyq, pedofılıa, esirtki taratý, adam saýdasy, áıelderge qarsy turmystyq zorlyq-zombylyq jáne jeke adamǵa, ásirese balalarǵa qarsy basqa da aýyr qylmystar jazasyn jedel túrde qatańdatýdy tapsyrdy" dep jazdy Erlan Qarın.

Prezıdent keńesshisi tıisti zań jobasynyń kúzde Parlamentke túskenin atap ótti.

"Al 30 jeltoqsanda Prezıdent "Qazaqstan Respýblıkasynyń keıbir zańnamalyq aktilerine qylmystyq, qylmystyq-prosestik zańnamany jetildirý jáne jeke adam quqyqtarynyń qorǵalýyn kúsheıtý máseleleri boıynsha ózgerister men tolyqtyrýlar engizý týraly" zańǵa qol qoıdy jáne ol 2020 jyldyń 1 qańtarynda kúshine endi. Zańnyń jańa normalaryna sáıkes, ortasha aýyrlyqtaǵy zorlyq-zombylyq qylmysy aýyr qylmys sanatyna aýystyryldy. 14 jasqa tolmaǵan balalarǵa zorlyq-zombylyq úshin 20 jylǵa deıin bas bostandyǵynan aıyrý nemese ómir boıy qamaý jazasy kózdeledi. Odan bólek, pedofılıa faktilerin jetkizbeý, jasyrý, burmalaý úshin de jaýapkershilik belgilengen. Bul endi 6 jylǵa deıin bas bostandyǵynan aıyrýy múmkin aýyr qylmys bolady. Balalarǵa qatysty zorlyq-zombylyqpen kúres máselesi – bizdiń memleket úshin basym baǵyttardyń biri" dedi Erlan Qarın.