Almaty qalasynyń ákimi Baqytjan Saǵyntaev Halyk Arena-daǵy koronavırýstyq ınfeksıasy bar naýqastardy emdeıtin aýrýhana retinde jumys isteýge daıyndyq barysymen tanysty.

Qala ákimi óziniń Instagram-daǵy paraqshasynda qaladaǵy ınfeksıalyq jáne provızorlyq aýrýhanalarǵa qosymsha oryndar uıymdastyrý týraly jazdy.

«Qaladaǵy juqpaly jáne provızorlyq stasıonarlar úshin qosymsha ashylýǵa tıis oryndardyń uıymdastyrý barysymen tanystym. Halyk Arena-da 1 myń orynǵa arnalǵan, sonyń ishinde reanımasıalyq 60 oryn ashylady. Daıyndyq barysynda sanıtarlyq qaýipsizdiktiń eń qatań talaptary eskerilýde. Taza jáne las aımaqtarǵa arnalǵan shlúzder men týnelder, jeldetý jáne zararsyzdandyrý júıeleri ornatyldy. Kezeń-kezeńimen medısınalyq jabdyqtar ornatylady. Dárigerlik brıgadalar daıyndalýda. Jaqynda arada bul jer alǵashqy pasıentterdi qabyldaıdy», — dep habarlady B. Saǵyntaev.

Jaqynda Jarbosynov atyndaǵy ýrologıa UO-y bazasynda 150 orynǵa arnalǵan ınfeksıalyq stasıonar ashylatyn bolady. Búginde qoǵamdyq densaýlyq basqarmasy ornalasqan OQK korpýsynda qosymsha oryndar ashylady. Sondaı-aq juqpaly aýrýlar aýrýhanasynda da qosymsha oryndar ashylý kózdelgen. Sondaı-aq №4 perzenthananyń jańa ǵımaratyn paıdalanýǵa berý tezdetiledi. Psıhonevrologıalyq ortalyqtyń qurylysy aıaqtalýǵa jaqyn. Bir aıdan keıin bul jer juqpaly aýrýlar stasıonaryna aınalady. Osy aralyqta basqa da nysandar, sonyń ishinde qonaq úıler, sanatorııler men jataqhanalar daıyn bolady.

«Qabyldanǵan sharalardyń arqasynda Memleket basshysynyń tapsyrmasyna sáıkes qajetti oryndar rezervi qurylatyn bolady», — dep Almaty qalasynyń ákimi B. Saǵyntaev búginde Almatyda qaýipti indetti juqtyrǵan naýqastardy emdeý úshin 4669 orynǵa arnalǵan 21 medısınalyq uıym jumys isteıtinin tilge tıek etti.