AQSH senatynyń barlaý komıteti Tramptyń Pýtınge jazǵan belgisiz hattary týraly esebin jarıalady. Bul demokrattardyń "2016 jylǵy saılaýda bılikke jetý úshin Tramp Pýtınmen jasyryn baılanysty" degen úndeýlerine kúsh bergendeı. 

Baıandamada atap kórsetilgen 2007 jylǵy hatta Tramp Pýtınniń "úlken jankúıeri" ekenin málimdegen.

2007 jyly Pýtın Time jýrnalynyń "jyl adamy" atanǵan, sol kezden bastap Tramp pen Pýtın arasynda jaqsy baılanys bolǵan.

– Time jýrnalynyń "jyl adamy" atanǵanyńyzben quttyqtaımyn, siz buǵan laıyqsyz. Siz estigendeı, men sizdiń úlken jankúıerińizbin! Óz-ózińizdi kútińiz,–dep jazǵan Tramp.

2013 jyly jazǵan birqatar hattarynda Tramp Reseı prezıdentin "Álem arýy" baıqaýynda "sulý áıelderdi" kórýge shaqyrǵan.

"Men Máskeýde eń úzdik jáne álem arýy baryn bilemin. Biz halyqaralyq jáne reseılik buqaralyq aqparat quraldarynyń jaǵymdy jáne aýqymdy pikirlerine tań qaldyq. Men osy múmkindikti paıdalanyp, sizdi qurmetti qonaq bolýǵa shaqyramyn" dep jazylǵan hatta.

Sodan keıin bul shara "álemdegi eń sulý áıelderdi" qabyldaıtynyn Tramp óz qolymen jazǵan.

Sonymen qatar shaqyrý hatynda Máskeýdegi is-sharada Tramp myrzamen seriktes bolǵan olıgarh Aras Agalarov ta atalǵan.

Senattyń esebinde Reseıdiń 2016 jyly AQSH-taǵy prezıdent saılaýyna aralasqany, sondaı-aq bedeldi amerıkalyqtar týraly kompromat jınaǵany aıtylǵan.

Esep shamamen 1000 betke deıin jetedi. Baıandama Tramp pen onyń kómekshileriniń Reseı úkimetiniń sheneýnikterimen baılanysynyń úlken jelisin jarıalaǵan.

Eń tańqalarlyq tusy, reseılik barlaý ofıseri Konstantın Kılımnık Tramptyń burynǵy naýqan menedjeri Pol Manafortpen tanys bolǵan.

Habarlamada Manaforttyń 2016 jyly Kılımnıkpen kezdesip, Tramp myrzanyń Hılları Klıntondy qalaı jeńýi múmkin ekendigin talqylanǵany jáne reseılik shpıonǵa ishki saılaý týraly málimetterdi bergeni aıtylǵan.

Biraq Senat komıteti Manaforttyń bul aqparatty ne úshin bergenin nemese Kılımnık onymen ne istegenin "anyqtaı almaıtynyn" aıtty.

Esep boıynsha, reseılik bıznesmen Devıd Geovanıstiń uıymdastyrýymen Tramp 1996 jyly Máskeýde bolǵan. Baıandamaǵa sáıkes, uıymdastyrýshy Devıd Geovanıstiń Reseı qaýipsizdik qyzmetterimen baılanysy bar.

"Máskeýdegi qabyldaýshylar keıbir AQSH kásipkerlerin jezóksheler turatyn túngi klýbtarǵa nemese keshterge jıi aparǵan. Reseıdiń qaýipsizdik qyzmeti nemese arnaıy qyzmetteri aqparat jınaý úshin osyndaı múmkindikterdi paıdalanady" dep jazylǵan baıandamada.