«Nur Otan» partıasynda partıaishilik praımerızde daýys berýdi baıqaýshylardyń mindetteri men ókilettikterin aıqyndaıtyn ereje bekitildi. Bul týraly partıa Tóraǵasynyń birinshi orynbasary Baýyrjan Baıbek Facebook-tegi paraqshasynda jazdy.

«Qurmetti dostar! Búginde Elbasy, partıa Lıderi Nursultan Nazarbaevtyń bastamasymen qolǵa alynǵan «Nur Otan»-nyń partıaishilik saılaýyna qatysýǵa búkil el boıynsha úmitkerlerdi usyný men tirkeý júrip jatqanyn jaqsy bilesizder.

Tek alǵashqy eki kúnniń ózinde 3209 azamat ótinish berdi. Olardyń 1138-i – áıelder, onyń ishinde 48-i – kóp balaly ana. 788 kandıdat – 35 jasqa deıingi jastar, sondaı-aq 31-i – erekshe qajettilikteri bar azamat. Bastaýysh partıa uıymdary arqyly 1079 adam usynylsa, 2130 kandıdat – ózin-ózi usynǵandar.

Kez kelgen saılaý prosesiniń aıqyndyǵy men legıtımdiliginiń ajyramas belgileriniń biri táýelsiz baıqaýshylardyń qatysýy bolyp tabylady. Sondyqtan biz óńirlerdegi partıalyqtarmen birge jan-jaqty talqylaı otyryp, baıqaýshylardyń mindetteri men ókilettikterin anyqtaıtyn erejeni bekittik.

Sonymen, kandıdattyń senim bildirgen tulǵasy (partıa múshesi) baıqaýshy bola alady.

Daýys berý kúni ol daýystardy sanaý rásimderi men ýchaskelerde daýys berý qorytyndylaryn resimdeýdi baqylaýǵa, tasymaldanatyn ýrnalardyń qasynda júrýge, usynystar berýge jáne esep komısıasynyń sheshimderi boıynsha shaǵym jasaýǵa, sondaı-aq paıdalanylmaǵan búletenderdi joıý kezinde basynda bolýǵa quqyly. Foto jáne beınejazba jasaýǵa ruqsat etiledi.

Buzýshylyq faktilerin anyqtaǵan jaǵdaıda baıqaýshy esep komısıasynyń múshelerin habardar etedi. Olqylyqtar joıylmaǵan nemese negizdelgen bas tartý usynylmaǵan jaǵdaıda, ol aımaqtyq jáne aýmaqtyq partıalyq baqylaý komısıasyna shaǵymdanýǵa quqyly.

Atalǵan orynnyń bergen qarastyrý nátıjelerimen kelispegen jaǵdaıda, baıqaýshy shaǵymdy komek@nurotan.kz elektrondy pochtasy boıynsha Ortalyq partıalyq baqylaý komıtetine joldaı alady. Ol eki kún ishinde túpkilikti sheshim shyǵarýǵa mindetti. Sondaı-aq 8 (800) 080 4441 arnaıy jedel jelisi uıymdastyrylǵan.

Sonymen qatar onlaın-daýys berý ótkizý úshin biz otandyq İT-mamandarmen birlesip «Praımerız» aqparattyq júıesin ázirledik. Ol saılaý barysyna qandaı da bir zańsyz aralasý nemese kenetten «irkilip» qalý yqtımaldyǵyna jol bermeı, daýystardy naqty ýaqyt rejıminde sanaý múmkindigin kózdeıdi.

Jalpy, qazirgi kezde ashyq ta ádil partıaishilik saılaýdyń ótýine qajetti barlyq jaǵdaı jasalǵan. Partıa Lıderi Nursultan Nazarbaev praımerız bastalar kúni atap ótkendeı, bastysy – aıqyndyq pen tazalyqty, barlyq qatysýshylarǵa teń múmkindik pen básekelestikti qamtamasyz etý.

Taǵy da barshańyzdy praımerızge qatysýǵa shaqyramyn. Úmitkerlerdi usyný men tirkeý merziminiń bitýine nebári bir aptadan astam ýaqyt qaldy.

Baıqaýshylarǵa arnalǵan erejemen tolyǵyraq nurotan.kz jáne primaries.kz saıttarynda ornalastyrylǵan nusqaýlyqtan tanysýǵa bolady», - dep jazdy Baýyrjan Baıbek.

Eske sala keteıik, Nursultan Nazarbaevtyń tapsyrmasymen «Nur Otan» praımerızi tuńǵysh ret respýblıkalyq partıaishilik saılaý aýqymynda ótedi. Bul – Elbasynyń bastamasymen qolǵa alynǵan «Senim. Dıalog. Bolashaqqa nyq qadam» partıa jumysyn «qaıta jandandyrý» baǵdarlamasynyń qorytyndy kezeńderiniń biri.

Praımerızge qatysý úshin ótinishti https://primaries.kz/ saıtynda «Praımerız» aqparattyq júıesi arqyly onlaın joldaýǵa nemese aýmaqtyq uıymdastyrý komıtetterine jeke ótinish berýge bolady. Kandıdattardy usyný jáne tirkeý 28 tamyzǵa (qosa eseptegende) deıin jalǵasady.