Prezıdent Qasym-Jomart Toqaev jemqorlyq jasaǵan ákimderge qatysty pikir bildirdi. Bul týraly Aqorda saıty habarlady.

– Sybaılas jemqorlyqqa qarsy kúres – elimizdiń strategıalyq damýyndaǵy negizgi basymdyqtardyń biri. Bul – meniń berik ustanymym jáne saılaýaldy baǵdarlamada halyqqa bergen ýádem. Osy jumysta eshqandaı kózboıaýshylyqqa, "barmaq basty, kóz qysty" áreketterge jol berilmeýge tıis. Talap qatań bolady. Byltyrǵy jıynda biz naqty is-qımyl josparyn aıqyndadyq. Búginde birqatar maqsatty júzege asyrdyq. Qazaqstan bedeldi halyqaralyq GREKO uıymyna, ıaǵnı sybaılas jemqorlyqqa qarsy memleketter tobyna múshe boldy. Normatıvtik aktilerdi sybaılas jemqorlyqqa qarsy saraptamadan ótkizý ınstıtýtynyń jumysy jańǵyrdy, – dedi memleket basshysy.

Toqaev qol astyndaǵylardyń jemqorlyq áreketteri úshin basshylaryn qyzmetinen bosatý qaǵıdaty engizilgenin atap ótti.

– Sybaılas jemqorlyq jaǵdaılarynyń sany áli de azaımaı tur. Ótken jylmen salystyrǵanda jemqorlyq áreketteri úshin jaýapqa tartylǵan adamdardyń sany 11 paıyzǵa artqan. Ashyǵyn aıtqanda, qazir kúndelikti jańalyqtardan túrli deńgeıdegi sheneýnikterdiń sybaılas jemqorlyqqa baılanysty zań buzýshylyqtary úshin ustalyp jatqany týraly oqıtyn boldyq. Sheneýnikterdiń ishinde eki oblys ákimi de bar. Munyń ózi "óte qaýipti sımptom", – dedi ol.

2020 jyly 7 aıdyń qorytyndysy boıynsha sybaılas jemqorlyq úshin qylmystyq jaýapqa tartylǵandardyń sany 912 adamdy qurady. Bul ótken jyldyń týra osy kezeńimen salystyrǵanda 11 prosentke artyq. Ótken jyly 820 adam bolǵan.

– Pandemıa kezeńinde jáne memleket pen azamattarymyzdyń tabysy azaıǵan tusta jemqorlyqpen kúresti odan ári kúsheıtýimiz kerek. Halyqaralyq sarapshylardyń aıtýy boıynsha memleketter pandemıanyń saldarymen kúreske mol qarajat jumsap jatqan kezde qarjyny maqsatqa saı paıdalanbaý jáne jymqyrý qaýpi arta túsedi. Bólinip jatqan qarajat muqıat ári tıimdi jumsalýǵa tıis. Bul – ár teńge óziniń maqsatyna saı jumsalýy kerek degen sóz. Ásirese, qazirgi jaǵdaıda esh paıdasy joq jáne qajetsiz is-sharalarǵa qarajattyń shyǵyndalýyna qoǵamnyń qalaı qaraıtynyn kórip otyrmyz. Sondyqtan, mundaı máselelerge  bolary bolyp, boıaýy sińgennen keıin emes, aldyn ala mán berý – óte mańyzdy, – dep prezıdent sózin túıindedi.