Qazaq handyǵynyń 550 jyldyǵy handyqtyń kezinde babasy bul jerde turmaǵan otandastarymyzdyń shamyna tıip jatsa kerek. Ony sport komentatory Dmıtrıı Mostovoı áleýmettik jelide handyqtyń 550 jyldyǵyn ashyq túrde balaǵattaǵynanynan ańǵarý qıyn emes. Dmıtrııdiń Tvıtterdegi jazbasy kópshiliktiń ashýyn týǵyzǵan bolatyn.
Endigi kezekte ol iship otyryp jazǵan jazbasy úshin óziniń Facebook paraqshasynda keshirim surapty.
Elimizde bolyp jatqan ekonomıkalyq jaǵdaı ashýlandyrypty-mys. Alaıda bizdiń teńgeniń qunsyzdanýyna Qazaq handyǵynyń qatysy qansha? Kerisinshe, kórshimizdiń aqshasynyń quldyrap ketkenine baılanysty sol jaqtyń tumaýy bizdiń ekonomıkaǵa da juǵyp jatqanyn kózi qaraqty adam túsinip otyr. Onsyz da qazaqtyń teńgesi munsha nege quldyrady dep kúızelip otyrǵan sátte jyǵylǵan kóńilge judyryq silteýdiń ne qajeti bar edi ? Ras, Mostovoı keshirim surady. Keshirmeı qaıda baramyz. Bizdiń keshirgen, keshirmegenimizge qarap otyrǵan ol joq. Biraq oıyndaǵysyn aıtyp aldy ǵoı. Másele sonda. Ekonomıkalyq kóńilsizdik bizdiń boıdy da bılep tur. Biraq biz ol úshin Qazaq handyǵyn túrtpektegen joqpyz. Sebebi ol biz úshin kıeli uǵym. Osy jerdi meken etken ózge ultty otandastarymyzǵa da kıeli bolýy tıis edi. Olaı emes eken.
Handyǵymyzdy tildegen sabaz bizdiń memlekettik tilde keshirim surasa, barlyǵymyzdyń ishimiz jylyp sala berer edi ǵoı. Bizdiń tilimiz ben tarıhymyzdy zerdeleımeı-aq osy elde nan taýyp, qyzymen birge shetelge demalyqa shyǵatyn azamattyń keshiriminiń qazaqsha «tárjima» mátini mynandaı bolyp shyǵady:
«Árıne bul áreketim meniń tarapymnan ketken aqymaqtyq. Ashýlanǵan kezde oıyma kelgeni osy boldy. Tańerteń atalǵan jazbany dereý óshirip tastadym. Meniń aıtpaıyn degenim bul emes. Sońǵy kúnderi bolyp jatqan elimizdegi aýyr ekonomıkalyq jaǵdaıdan keıin, toı toılatýdy doǵarsaq degen oı. Bul oıymnan men bas tartpaımyn. Ózim kinálimin. Men óz Otanymdy qatty jaqsy kóremin. Eger jaqsy kórmesem, men bul jaqta bolmaýshy edim. Men atalǵan jazba úshin barylyǵynan keshirim suraımyn», – deıdi Dmıtrıı Mostovoı Facebook jelisindegi jeke paraqshasynda.
«Toı toılatýdy doǵarsaq degen oıy» bolypty. Onda nege EXPO-2017-ni mysalǵa keltirmegen. Toıdyń kókesi sol emes pa? Osy ýaqytqa deıin as ta tók shyǵyn jasaǵan memleket «Qazaq handyǵyna» kelgende nemenege jıyryla qaldy. Bul tusta Mostovoıǵa da renjı almaımyz. Bizdiń mınıstrliktiń ózi handyqtyń Uly toıyna aqsha joq dep aıtqan bolatyn. Demek ózimiz aýzyna salyp berip otyrmyz.
Aınur Tóleý
