Almaty qalalyq ishki saıasat basqarmasynyń basshysy Sanjar Boqaev qyzmetinen ketti. Bul týraly ol óziniń Feısbýktaǵy paraqshasynda habarlady dep jazady «Qamshy» portaly QazAqparat agenttigine silteme jasaı otyryp.
«Almaty ákimdigindegi qyzmetimdi támamdaýdy sheshtim. Birinshiden, burynǵy ákim Ahmetjan Esimovke maǵan tájirıbe alýǵa múmkindik bergeni úshin alǵysymdy bildirgim keledi. Jańa ákim Baýyrjan Baıbekke de túsinistik pen qoldaý bildirgenine alǵysym sheksiz. Oǵan jańa qyzmetinde tolaǵaı tabystar tileımin. Birge jumys istegen áriptester men qala turǵyndaryna kóp rahmet», - dedi ol paraqshasynda.
Sanjar Boqaev 1982 jyly týylǵan. Saıasattaný mamandyǵy boıynsha PhD doktory, Kolýmbıa ýnıversıtetinde, M.Lomonosov atyndaǵy Máskeý memlekettik ýnıversıtetinde bilimin jetildirgen.
Ár jyldary QR Prezıdenti janyndaǵy Qazaqstan strategıalyq zertteýler ınstıtýtynda jumys istegen. Ál-Farabı atyndaǵy QazUÝ-da «Saıasattaný» páni boıynsha sabaq bergen, kafedra dosenti qyzmetin atqarǵan.
«Nur Otan» HDP Almatydaǵy bólimshesi tóraǵasynyń orynbasary laýazymynda qyzmet atqarǵan. Keıin qalalyq ákimdikte jastar saıasaty máseleleri jónindegi basqarmanyń, ishki saıasat basqarmasynyń basshysy bolǵan.
