Qytaıdyń ortalyǵy Beıjińde Jeńistiń 70 jyldyǵyna(Germanıa men Japonıa basqynshylaryna qarsy) oraı ótetin áskerı paradqa jalpy sany 12 myńnan astam sarbaz qatysady. Qazir Qytaı aýqymdy sharaǵa daıyndalyp jatyr. Al áskerıler bolsa, ázirlik sharalaryn úsh aı buryn bastap ketken. Bul týraly Qamshy" aqparattyq portaly  Baq.kz-ke silteme jasaı otyryp habarlaıdy.

 Qytaı Halyqtyq azat etý armıasynyń betke ustar sarbazdary Beıjińniń qapyryq ystyǵynda úsh aıdan beri jattyǵyp keledi. 40 gradýsta jaýyngerler sý bolyp terleıdi. Keıbiri bul qıyndyqqa shydamaı talyp ta jatty. Biraq tártip qatal, talap joǵary. Sap túzep adymdaǵanda qalt ketpes úshin, kózderin baılap, qumnyń ústimen júredi. Jalpy Qytaı aýqymdy sharalardy ótkizgende adam resýrsymen tańqaldyrýdan jalyqqan emes. Bul joly da qyrkúıektiń úshindegi áskerı paradqa 12 myńnan astam jaýynger qatysady.

 «Men alǵash jalaý ustap júrý mindetin qabyldap alǵanda úlken jaýapkershilikti sezindim. Abyroıly isti minsiz atqarý úshin kúni-túni jattyqtym. Daıyndyq barysynda baıraqtyń sabyn aýyr temirge aıyrbastap, ornyqty adymdaý úshin, jalaýdyń joǵarǵy jaǵyna sý toly ydys qoıdym. Sarbazdardyń kóbi 20 jas shamasynda, men 30-dan astym, sondyqtan ońaı bolǵan joq», – deıdi Áskerı paradta tý ustap júrýshi Jań Hýńjıe.

 Bıylǵy paradta jaıaý ásker tórtke bólinip óner kórsetedi. Jeńistiń 60 jyldyǵymen salystyrǵanda bul joly sarbazdar sany azaıtylǵan. «Biraq sapaǵa kóp kóńil bóldik», – deıdi uıymdastyrýshylar. Aıtpaqshy bıyl tuńǵysh ret qurmetti qaraýyl qyzmetindegi áıelder áskerı paradqa qatysady. Áskerı sarapshylardyń aıtýynsha, osy jyly dúıim jurt Qytaıdyń eń ozyq qarýy sanalatyn, jetildirilgen T99 tanksin kóre alady. Budan bólek, Tánanmyndegi sherýge 40 túrli 500 tehnıka, 20 túrli 200 ushaq shyǵarylady. Jalpy kórsetiletin tehnıkanyń 84% alǵash ret jurt nazaryna usynylady. Osy sherýge Qazaqstan Qorǵanys mınıstrliginiń qurmetti qaraýyl rotasynan kelgen 100-ge jýyq jerlesimiz de qatysady. Qazir olar qytaılyq áriptesterimen birge daıyndyq ótkizip jatyr.