Ońtústik Qazaqstan oblystyq ishki saıasat basqarmasynyń burynǵy basshysy Berik Ýálı myrzanyń «Nur Otan» partıasy tóraǵasy birinshi orynbasyrynyń keńesshisi qyzmetine taǵaıyndalǵany týraly «Qamshy» portalynda habarlaǵan bolatynbyz.
Berik Ýálıuly Ońtústik Qazaqstan oblysynda İshki saıasat basqarmasyn basqarǵan jyldary qandaı sharýalar atqaryldy, Ýálıuly Berik Qurmanǵalı myrza ońtústik qazaqstandyqtardyń esinde nesimen qaldy? Belgili jýrnalıs, ultshyl azamat Berik Ýálıulynyń atqarǵan jumystarynyń birsyparysyn «Qamshy» portaly tizbelep kórgen edi.
1. Eń áýeli Alashorda úkimetiniń 95 jyldyq mereıtoıyna arnalǵan resmı konferensıany ońtústikte uıymdastyryp edi. Alashordanyń 90-95 jyldyqtarynda bılikte Álıhan Bókeıhan ıdeıasyn uǵynatyn azamattar sırek desken. Sóıtsek, tarıh qazaqtyń da upaıyn aqyryndap túgendep kele jatsa kerek.
2. Qazaq handyǵynyń 550 jyldyǵyna oraı «Dinı turaqtylyq – el damýynyń kepili» ǵylymı-praktıkalyq konferensıa ótti.
3. OQO İshki saıasat jáne din isteri basqarmasynyń tapsyrysy boıynsha jeńistiń 70 jyldyǵyna oraı «Maıdangerler» atty qysqametrajdy fılm túsirildi. Tek bul ǵana emes, negizgi mamandyǵy kınosynshy Berik Ýálıuly óńirde túrli mádenı aýqymdy sharalardyń uıytqysy bola bildi. BAQ pen qoıan-qoltyq jumys isteýge bar kúsh-jigerin salǵany da jasyryn emes.
4. Memlekettik mańyzy bar áleýmettik sharalar úzdiksiz ótkizilip keldi. Mysaly: Rámizder kúni, Mereıli otbasy, 100 naqty qadam boıynsha Jýrnalıserdiń aımaqtyq forýmy, meshit ımamdarynyń szezdi jáne túrli ǵylymı-praktıkalyq konferensıalar men semınarlar t.b.
5. Berik Ýálıulynyń ońtústikke kelýimen qalada tarıhı tulǵalarǵa arnalyp eskertkishter kóptep boı kótere bastady. Bir ǵana Astana kúni qarsańynda 75 nysannyń ashylýyn uıymdastyrdy.
Shtatıv kóterip júretin qarapaıym tilshiden memleketshil tulǵaǵa deıin ósken Berik Ýálıuly talaı "Dodalarda" "Erkin sózin" aıtyp, memleket pen qoǵamnyń kúrdeli máselesimen "Betpe bet" kezigip, alashtyń "Amanatyn" arqalap júrgeni úshin de halyqtyń júreginde qalǵan azamat desek ásire siltegenimiz bolmas.
Berik Qarmanǵalı Ońtústikte ishki saıasattyń da baǵyn ashyp edi, endi bar biligin kezinde ózin shyńdaǵan "Nur Otanyna" salmaqshy. Jańa qyzmetke taǵaıyndalyp jatqan Berik Ýálıulyna aıtar tiligemiz bar.
Qazirgi qoǵamda «Nur Otan» men «Aıtys» egiz uǵymǵa aınalǵany jasyryn emes. Qazaq aıtysy sońǵy kezderi partıanyń, sosyn dinı toptaǵylardyń ermegine aınalyp ketti deıdi esti jurt. Ómirin aıtyspen ushtastyrǵan qazaq halqynyń kóńili de sýyı bastaǵany jasyryn emes. Iá, aıtyskerler de ekige bólinip tyndy. El arasynda «kimniń aıtyskerlerin shaqyramyz?» degen replıkanyń da paıda bolǵany ras. Endigi jerde bas partıaǵa Asqar Myrzahmetov pen Berik Ýálıuly keldi. Buryndary toı-toılaýdan deńgeıi aspaǵan bas partıanyń – shyn mánindegi halyqtyq, memlekettik máselelerge aralasyp, ulttyń múddesi úshin, halyqtyń ýáji úshin qyzmet etedi, partıa men memleket qarjysy toı-tomalaqtan ózge halyq ıgiligine jumsalýyna sizder bas-kóz bolady dep senemiz.
Nurgeldi Ábdiǵanıuly
