Kópten kórinbeı ketken aıtysker aqyn Rınat Zaıtov birneshe aptadan beri áleýmettik jelide belsendi. Youtube arnasynda birneshe baǵdarlama shyǵaratynyn aıtqan ol búginde alǵashqy túsirilimderin jarıalap ta úlgerdi. Aqyn Qamshy tilshisine kórinbeı ketýiniń sebebi, jańa jobasy, "NurOtan" partıasynyń qataryna qandaı jaǵdaıda kirýge ázir ekeni jóninde aıtyp berdi.
Rınat Zaıtov suhbattarǵa kelispeı, kózden tasa júrgenniń sebebin bastap jatqan jańa jobaǵa baılanysty sharýanyń qaýyrt bolýymen túsindirdi.
– Jobany ázirleý aıasynda kóp jumys isteý kerek boldy. Onyń ıdeıasy, daıyndyq kezeńi, túsirilimder taǵysyn taǵy degendeı. Jobany iske asyrý úshin kishigirim qarjy kerek. Sony izdeý jolynda júrdik. Munyń bári eńbek, bári jumys. Sosyn "aıdaǵanyń bes eshki, ysqyryǵyń jer jarady" degendeı kóringen jerge baryp "men búıtkeli jatyrmyn" dep aıta bergendi qup kórmedim. Suhbat bermeı ketýim jýrnalıserdiń Dımash jaıly qaıta-qaıta suraıtynymen baılanysty. Ol ótken, ketken, jabyq taqyryp qoı. Ony qaıta-qaıta qazbalaǵannan ne paıda?! Ol taqyryp maǵan qazir qyzyq emes, – deıdi ol.
Aıtyskerdiń aıtýynsha, youtube jobalardy qolǵa alyp jatqandaǵy maqsat – qazaqqa tálim-tárbıe beretin, oı salatyn dúnıeler usyný. Baǵdarlamalarynda ultarazdyqty týdyratyn, el ishine iritki salatyn áńgimelerge jol berilmeıdi. Basqasynyń bárin aıtýǵa ázir.
Sondaı-aq aqyn sońǵy suhbattarynyń birinde "eger shaqyrsa, NurOtan partıasyna da barýǵa daıynmyn" degen sózine túsinik berdi.
– Eger eldiń sózin sóıleýge múmkindik beretin jer bolsa, men NurOtan-ǵa barýǵa ázirmin. Maǵan óz oıymdy aıtatyn jer bolsa, boldy. Belgili bir partıa belgili bir saıasat ustanady degenge senbeımin. Bizdegi partıalardyń bári tek bir baǵyt ustanady. Bul jerdegi basty másele – sol partıalardyń ishindegi adamdardyń ózgerýinde. Mine, solar ózgerýi kerek, – dep atap ótti aqyn.
Zaıtov bılik partıasyna ótken jaǵdaıda aýzy býylyp qalmaıtynyn, partıaǵa eldik múdde úshin ǵana baratynyn, mánsap ataýlyǵa qyzyqpaıtynyn jetkizdi.
– Aýzym býylmaıdy. Ary ketse shyǵaryp jiberer (partıadan – red.). Partıaǵa "kreslo" úshin barmaımyn. Men bılikke qyzyqsam, baıaǵyda bir jerge otyryp alatyn edim, ondaı múmkindik bolmady dep aıtpaımyn, – deıdi ol.
Onyń pikirinshe, ultty, eldi oılaıtyn azamat, eldiń sózin joǵaryǵa jetkizý úshin kez kelgen amalmen bılikke barýy kerek.
– Biz barlyǵymyz, ultty oılaıtyn, eldi oılaıtyn azamattar kez kelgen tesik arqyly bılikke qazir barmasaq, qazirgi tańda ol jaqqa baryp jatqan adamdardyń qarasy qorqynyshty. Al endi sol jerge jetý úshin adamdardy kóshege alyp shyqsam, ózgeris bolmaıdy. Sebebi joǵaryda zań bar, – dedi Zaıtov.
2019 jyly prezıdent saılaýynan keıin "zańdy jattap, partıa ashýdyń joldaryn qarastyramyn" degen ol qazirgi kezde partıa qurýdan nátıje shyqpaıdy degen pikirde.
– Partıa qurýdyń nátıjesi bolmaıdy. Men túsindirýden jalyqtym. Kez kelgen saıası qadam jaǵdaıǵa baılanysty jasalady. Mysaly, erteń partıa ashýǵa múmkinshilik berilse, nege qurmasqa? Biraq yryldasyp, 47 partıa quryp alǵansha, bar partıalar mámilege kelip, sonyń ishine ult dep sóıleıtin adamdardy, bir-birimen yryldasyp júrgenderdi kirgizý kerek. Meniń oıym bireý ǵana – halyqtyń sózin joǵary jaqqa jetkizý. Qaı jaq arqyly jetedi maǵan ol qyzyq emes, tek sony aıtatyn múmkindik berse boldy. Men máselen prezıdent, premer-mınıstr halyqtyń aýyr jaǵdaıyn kórip otyr degenge senbeımin. Olar júrgen jerde bárin jyltyratyp qoıady ǵoı. Bálkim, sol úshin kóp nárseni bilmeıtin shyǵar. Men sol úmitpen aıtqym keledi. Meniń taqqa, ıa bolmasa bılikke umtylǵan dymym da joq. Maǵan Toqaevtyń aldynda 15 mınýt sóıleýge múmkindik berse boldy. Sosyn men ketip, dombyramdy ustap, toıdyń aınalasynda betasharymdy aıtyp júre beremin, – dedi aqyn.
Zaıtov partıa quramyn degen málimdemesi emosıamen aıtylmaǵanynyn, al qazirgi bastamalary popýlızm emes ekenin atap ótti.
