Búgin elordadaǵy Táýelsizdik saraıynda ótip jatqan TMD-ǵa qatysýshy memleketter Bas prokýrorlary úılestirý keńesiniń 25-shi otyrysynda QR Bas prokýrory Asqat Daýylbaev Qazaqstanda 21 uıym ekstremıstik jáne lańkestik dep tanylǵanyn aıtty. Bul týraly "Qamshy" portaly Baq.kz -ke silteme jasap habarlaıdy.
«Sot tártibimen 21 uıym ekstremıstik jáne lańkestik dep tanylyp, olardyń qyzmetine respýblıka aýmaǵynda tyıym salynǵan. Sonymen qatar, sot arqyly Sırıa men Iraktaǵy lańkesterdiń qataryna qosylýǵa shaqyrǵan vıdeorolıkter de zańsyz dep tanyldy», - dedi ol.
A.Daýylbaevtyń atap ótýinshe, ekstremıstik mazmundaǵy materıaldardyń ǵalamtor arqyly taralýyna baılanysty shamamen 660 aqparattyq materıal men 700 saıttyń ónimderin jarıalaýǵa jáne taratýǵa tyıym salynǵan.
«Qazaqstan basqa elderdiń tájirıbesi negizinde dástúrli emes dinı aǵymdardyń yqpalyna ergen adamdardy áleýmettik ońaltý jumystaryn júrgizýde. Aldyn alý sharalary bas bostandyǵynan aıyrý oryndaryndaǵy dinı radıkaldardyń jartysynan astamynyń ustanymdaryn ózgertýge septigin tıgizdi. Degenmen, ekstremızm men lańkestik qaýpi tómender emes», - dedi QR Bas prokýrory.
"Qamshy" silteıdi
