Araı Aıdarhanuly - Qytaıdaǵy eń tanymal "Juńgnonyń arman áýeni" án jobasynda alǵashqy alty úzdiktiń qataryna engen qazaq.

- Al, Araı, qosh keldiń! Tuńǵysh prezıdent kúni qutty bolsyn! Onyń ústine qystyń alǵashqy kúni, qalyń qar da alǵash jaýdy...

- Birge bolsyn, aǵa! Astana burynǵydan ajarlana túsipti...

- Burynǵyń qalaı?...

- Men 2004 jyly eki jyl osyndaǵy Qajymuqan Muńaıtpasov atyndaǵy olımpıadalyq rezerv ınternat-kolledjinde oqyp, dzúdomen shuǵyldanǵanmyn.

- Solaı ma?! Ánshi ǵana emes, sportshy da ekensiń ǵoı. Nelikten ketip qaldyń?

- Ol kezde nebári on tórttemin ǵoı... Meni qytaı dep shettetetin, jıi taıaq jeıtinmin. Onyń ústine jarystarǵa da qatystyrmady. Sportshy túrli qarsylastarynan tájirıbe jınaqtaý kerek emes pe?! Al men úshin basty qarsylas – jattyqtyrýshym bolatyn... Naq maıdanda baq synaspaǵannan keıin damýyń da qıyn ǵoı. Qytaıǵa keri oralardan eki aı buryn artymnan anam da keldi. Osyndaǵy «Sálem» bazarynyń mańynda asqana ashtyq. Men sabaqtan keıin anama kómektesip, kók bazardan kerek-jaraǵyn tasıtynmyn... Sóıtip júrgenimde kólik qaǵyp ketip, aıaǵym syndy. Jaǵdaı qıyndaǵan soń, anam ekeýmizge Qytaıǵa qaıtýǵa týra keldi...

- Qalaı densaýlyǵyń?

- Shúkir, synyq bitip ketti. Ol ol ma, keıin qolymdy da syndyrdym... Sóıtip sportty birjolata qoıdym.

- Anam dep qaldyń, áke-shesheń qaı sala mamandary?

- Anam Aqsý qalasyndaǵy mektepte qytaı tiliniń muǵalimi. Ákem qazaqsha kúresten palýan atanǵan, elge belgili azamat. Sońǵy jyldary qazaqsha kúresten Azıa chempıonatyn uıymdastyryp júr.

- Bárekeldi. Ánshi ekenińdi qaı kezden bastap bildiń?

- Astanada júrgende ákemdi saǵynyp án shyǵarǵanmyn. Sodan qyzyǵýshylyǵym oıandy...

- Seni «Qytaıdyń arman úni» mýzykalyq jobasynan bilemiz. Qandaı baǵa beresiń? Basy-aıaǵy neshe án aıttyń?

- Konkýrs ońaı bolmady. Shart boıynsha alǵashqy ándi eshqandaı aspaptyń súıemeldeýinsiz ordadym. Sóıtip joba boıyna on án aıttym.

- Estýimshe qazir bir kompanıamen kelisim shartqa otyrypsyń?

- Ia, úzdik dep tanylǵandardy aıaǵyn jerge tıgizbeı alyp ketedi. Qazir olarmen 4 jyl jumys jasaımyn.

- Basty paıdasyn aıtyp bershi?

- Meniń qazirgi baǵam 25 000 AQSH dollary. Ár qatysqan keshterden túsetin bul qarajattyń 40 paıyzy maǵan tıeseli. Onyń syrtynda memleketke salyq tóleımiz.

- Demek, dárejeń ósken saıyn, naryqtaǵy qunyń da kóbeıedi ǵoı?

- Iá! Aldaǵy ýaqytta Qytaıdyń shaǵan merekesine arnalǵan keshke irikteý júredi. Oǵan Tasqyn aǵa ekeýmiz de qatysatyn boldyq. Ol sahnaǵa shyqsaq baǵamyz eki esege artatyn bolady.

- Bilýimshe, ánshiniń baǵasyn, dárejesin anyqtaıtyn memlekettik ortalyq bar?

- Iá, halyqtyń qabyldaýy eskerilip, ánshige statýs beriledi. Sóıtip, olardyń qandaı sahnaǵa shyǵatynynda olardyń bedel, dárejesi anyqtaıtyn bolady.

- Ókinishke oraı bizge sol jaǵy jetispeı tur, qazir...

- Iá, Qazaqstanda Qaırat pen Roza apamyz sahnaǵa «bir baspaldaqpen» shyǵyp júr ǵoı. Rasy kerek, Roza Rymbaevanyń kezindegi «Araı» tobynda oryndaǵan ánderin tyńdasań maqtanasyń. Án de keremet, ánshi de sheber. Al keı oryndaǵan ánderin tyńdaǵanda uıalatyn kezim bolady... Al Qaırat Nurtasty ánshi dep moıyndaı almaımyn.

- Sen Qazaqstannyń shoý-bıznesin qalaı baǵalaısyń?

- Ortalyqtandyrylǵan júıe qurmaı Qazaqstannyń án ónerin damytý qıyn. Ótken joly kelgenimde Baqytjan Qajymuqanov pen Rýslan Qarany arnaıy izdep baryp, amandasyp qaıttym. Ókinishke oraı osyndaı azamattar baǵalanbaı jatyr. Tipti Qazaqstannyń keıbir jastary bul kisilerdi tanymaıdy da. Al biz olardyń ánderin Qytaıdyń eń myqty kompozıtorlaryna maqtanyshpen tyńdatamyz... Menińshe tyńdarmandardyń mýzykalyq tanymyn arttyrý qajet. «Qyzyl órik» ol – «qyzyl túlki»... Oǵan aldanýǵa bolmaıdy. Damyǵan eldiń qataryna umtylyp jatqan Qazaqstan úshin qarapaıym halyqtyń dúnıetanymy men tanym talǵamyn da jetildirý qajet dep esepteımin.

- Elge kelý oıda bar ma?

- Árıne bar. Biraq dál qazir meniń ishki talabymdy, ónerimdi damytýǵa qolaısyzdaý...

- Qoı, talaı ýaqyt bopty... Demal. Erteń kezdesemiz...

- Jaqsy, aǵa. Demalaıyq...

Áńgimelesken Ertaı Núsipjanov

(Ertaı Núsipjanovtiń feısbýktegi paraqshasynan alyndy)