Indýstrıalandyrý baǵdarlamasy aıasynda Túrkistan men Kentaý qalalarynda jańa 15 nysan iske qosylady. Bul jaıynda OQO ákimi Beıbit Atamqulov atalǵan aımaqtardaǵy ındýstrıaldy aımaqtarǵa jasaǵan sapary barysynda aıtty,- dep habarlaıdy «Qamshy» portaly.

Óńir basshysy Túrkistan qalasyndaǵy ındýstrıaldy aımaqqa at basyn buryp, atqarylyp jatqan jumystarmen tanysty. Buǵan deıin birneshe ret synǵa ilikken nysan jumysyn teksergen Beıbit Bákiruly oǵan oń baǵa berip otyr. Jalpy aýmaǵy 40 gektardy quraıtyn aımaqta barlyǵy 8 kásiporyn boı kóteredi. Jyl sońyna deıin olardyń ekeýiniń quyrylysy aıaqtalsa, taǵy úsheýiniń irgetasy qalanady. Zaýyttardyń barlyǵy derlik qurylys materıaldaryn shyǵarýmen aınalysady. Atalǵan kásiporyndar 335 jýyq adamdy jumyspen qamtıdy.

Oblys ákimi qurylys jumystarynyń mezgilinen aýytqymaı, ýaqytyly aıaqtalýy úshin jergilikti bılik ókilderine naqty tapsyrmalar berdi.

Munan keıin B.Bákiruly Kentaýdaǵy ındýstrıaldy aımaqta bolyp, atqarylyp jatqan jumystarmen tanysty. Jalpy aýmaǵy 25 gektardy quraıtyn nysanda 7 joba júzege asyrylady. Olardyń úsheýi qaladaǵy transfarmator zaýytyna qajetti qosalqy bólshekterdi shyǵarýmen aınalyspaq. Jobalardy iske asyrý úshin barlyǵy 2 mlrd 127 mln teńge ınvestısıa tartylady jáne 165 jańa jumys orny ashylmaq. Sondaı-aq, ındýstrıaldy aımaq qajetti ınfraqurylymnyń barlyǵymen qamtylady.

Sapar sońynda óńir basshysy atalǵan ındýstrıaldy aımaqtardy jańa kásiporyndarmen tolyqtyrý úshin Túrkistan men Kentaý ákimderine ınvestorlar tartýdy tapsyrdy.

Nurzat Toǵjan