Almatyda «Uly dalanyń ultaralyq tili» taqyrybynda İ respýblıkalyq kongres ótti.

İs-sharaǵa Qazaqstan halqy Assambleıasy Tóraǵasynyń orynbasary – Hatshylyq meńgerýshisi Janseıit Túımebaev, QR Aqparat jáne qoǵamdyq damý vıse-mınıstri Marat Ázilhanov, fılologıa men lıngvısıka salasynyń sarapshylary, qoǵam qaıratkerleri, til janashyrlary, Assambleıa músheleri, etnomádenı jáne jastar birlestikteriniń ókilderi qatysty.

«Búgin «Uly dalanyń ultaralyq tili» forýmy aıasyn keńeıtip, birinshi respýblıkalyq til kongresin ótkizip otyrmyz. Jıyndy Qazaqstannyń Tuńǵysh Prezıdenti – Elbasy, Qazaqstan halqy Assambleıasynyń Tóraǵasy Nursultan Nazarbaevtyń «Qazaq tili barshany biriktiretin, jastardy jaqyndastyratyn tatýlyq tiline aınalýǵa tıis» degen sózimen bastaǵym kelip otyr. Memleketimizde ómir súrip jatqan barlyq ulttyń qazaq tilin – memlekettik til esebinde, ultaralyq til esebinde qoldanatyn kezi jetti. Prezıdentimiz Qasym-Jomart Kemeluly Toqaev Qazaqstan halqyna Joldaýynda «qazaq tili taıaý keleshekte ultaralyq til retinde qyzmet atqarýy qajet» degen sózi bar. Mine osy jumystardyń júzege asa bastaǵanyn kórsetý maqsatynda osyndaı kongresti uıymdastyryp otyrmyz»,– dedi Janseıit Túımebaev.

Óz kezeginde, QR Aqparat jáne qoǵamdyq damý vıse-mınıstri Marat Ázilhanov mınıstrlik elimizdegi etnomádenı birlestiktermen qashanda tyǵyz baılanys ornatýǵa múddeli ekenin atap ótti.

«Bul maqsatta baǵytymyz – aıqyn, josparymyz – belgili. Atap aıtqanda, elimizde 2014 jyldan beri etnomádenı birlestikter janynda memlekettik til men ár etnostyń óz ana tilin oqytý kýrstary uıymdastyrylyp keledi. Búgingi kúnge deıin osyndaı oqytý kýrstarynan 81% etnos ókili oqýdan ótipti. Jalpy, 2011 jyldan bastap Memlekettik til oqytý ortalyqtarynda jarty mıllıonnan astam el azamattary (513 624) qazaq tili kýrstaryn oqyp shyqqan»,– dedi ol.

Sonymen qatar, Marat Ázilhanov Memleket basshysynyń tapsyrmasy negizinde til saıasatyn iske asyrýdyń 2020-2025 jyldarǵa arnalǵan memlekettik baǵdarlamasy bekitilgenin tilge tıek etti.

«Rýhanı jańǵyrý» baǵdarlamasy aıasynda qazaq tilin latyn grafıkasyna kezeń-kezeńimen kóshirý jumystary júıeli júrgizilip keledi. Qazaq tiliniń qoǵamdaǵy qoldanys aıasyn keńeıtý baǵytyndaǵy jumystar osy baǵdarlamalar jáne basqa da jobalar sheńberinde óz jalǵasyn taba beretin bolady. Eń bastysy – memleket bul jobalardyń barlyǵynda da Sizderdeı talantty da belsendi azamattarǵa senim artady»,–dedi ol.