Beıbit ómir súrip jatqan adam úshin  “túnnen túgel shyǵaıyq” degen tirkestiń asa máni bolmaýy múmkin. Al  Ýkraınanyń  shyǵysyndaǵy mıllıondaǵan turǵyn osy tilekpen kóz shyrymyn alady. Donbass óńirindegi dúrbeleń áli de saıabyr tappaı turǵan kez.  Ýkraına qaýipsizdik komıtetiniń sońǵy statısıkalyq málimeti boıynsha irgedegi iri kórshisi - orys soldattarymen soǵysýǵa Ýkraınanyń eki júz myńnan astam áskeri jumyldyrylǵan eken. Búgingi kúnge deıin resmı málimet Ýkraına tarapynan eki myńǵa jýyq sarbazdyń jer jastanǵanyn aıtady. Eki el arasynda aqparattyq maıdan da qyzyp tur.  Al 25 tamyz - Ýkraınanyń Táýelsizdik kúni qarsańynda "erekshe" eskertkish ornatyldy.

Zaporoje qalasynyń bas alańyna jaıǵasqan tas músin  - «Orys álemi» jáne sol «álemdi» qorǵaımyn dep álekke túsken «ápendige» arnalǵan. Qalanyń qarapaıym turǵyny, ıdeıa avtory Maksım Drozdenko: «Eskertkish arqyly esi aýysqan basshynyń búgingi  «bolmysyn» kórsetkim keldi»,- degendi aıtady. Bul bir mysal ǵana. Kúnnen kúnge Kıev qana emes, qarapaıym turǵyndardyń da baýyrlas elge qabaǵy qatýlanyp keledi.  Ýkraına kóshelerinen “It úredi, kerýen kóshedi”,-deıtin uran sózderdi jıi kórýge bolady.

Al Kıev qalasynyń bas alańynan “sol kisiniń” sulbasy beınelengen dárethana qaǵazyn da satyp alý esh qıyn emes. Osylaısha árbir ýkraındyq óziniń ishki qarsylyǵyn bildirip jatyr.

Nazgúl Nurlanova, «Qamshy» portalynyń Kıevtegi arnaıy tilshisi